റഫായേൽ ലിയാവോയെ വിൽക്കാൻ എസി മിലാൻ ഒരുങ്ങുന്നു; ലക്ഷ്യം ബാഴ്സലോണയിലേക്കുള്ള മാറ്റം
ഈ വേനൽക്കാലത്ത് തങ്ങളുടെ സൂപ്പർ താരം റഫായേൽ ലിയാവോയെ വിൽക്കാൻ എസി മിലാൻ തയ്യാറെടുക്കുന്നതായി ഡിയാരിയോ സ്പോർട്ട് റിപ്പോർട്ട് ചെയ്യുന്നു. മാനേജർ മാസിമിലിയാനോ അലെഗ്രിയുമായുള്ള അഭിപ്രായവ്യത്യാസങ്ങളും പ്രകടനത്തിലെ സ്ഥിരതയില്ലായ്മയുമാണ് ലിയാവോയെ ടീമിൽ നിന്ന് ഒഴിവാക്കാൻ ക്ലബ്ബിനെ പ്രേരിപ്പിക്കുന്നത്.
വേതനച്ചെലവ് കുറയ്ക്കുന്നതിനായി പോർച്ചുഗീസ് താരത്തെ വിൽക്കാൻ എസി മിലാൻ തീരുമാനിച്ചു. ഇതിനായി താരത്തിന്റെ മൂല്യം 50 ദശലക്ഷമായി കുറയ്ക്കുകയും ചെയ്തിട്ടുണ്ട്. സൗദി പ്രോ ലീഗിൽ നിന്ന് താരത്തിന് ഓഫറുകൾ ഉണ്ടെങ്കിലും യൂറോപ്പിൽ തന്നെ തുടരാനാണ് ലിയാവോ ആഗ്രഹിക്കുന്നത്. ബാഴ്സലോണയിലേക്ക് മാറാനാണ് അദ്ദേഹം മുൻഗണന നൽകുന്നത്.
ബാഴ്സലോണയോടുള്ള തന്റെ താൽപര്യം ലിയാവോ നേരത്തെ വ്യക്തമാക്കിയിരുന്നു. എൽ ക്ലാസിക്കോയിൽ റൊണാൾഡീഞ്ഞോയുടെ ചിത്രം പങ്കുവെച്ച്, ബ്രസീലിയൻ താരമാണ് ഏറ്റവും മികച്ചതെന്ന് അദ്ദേഹം സമൂഹമാധ്യമങ്ങളിൽ കുറിച്ചു. മാർക്കസ് റാഷ്ഫോർഡിന്റെ കാര്യത്തിൽ അനിശ്ചിതത്വം നിലനിൽക്കുന്ന സാഹചര്യത്തിൽ പുതിയൊരു വിങ്ങറെ തേടുന്ന ബാഴ്സലോണയ്ക്ക് ലിയാവോയുടെ വരവ് ഗുണകരമാകും.
ബാഴ്സലോണ പ്രസിഡന്റ് ജോവാൻ ലപോർട്ടയ്ക്ക് ലിയാവോയുടെ കഴിവിൽ നേരത്തെ തന്നെ മതിപ്പുണ്ട്. കൂടാതെ ലിയാവോയുടെ ഏജന്റ് ജോർജ് മെൻഡസുമായി ബാഴ്സലോണയ്ക്ക് മികച്ച ബന്ധമാണുള്ളതും ഈ കൈമാറ്റത്തിന് സഹായകമായേക്കും.