എസി മിലാന്റെ പോർച്ചുഗീസ് മുന്നേറ്റനിര താരം റഫായൽ ലിയാവോ ഈ വേനൽക്കാല ട്രാൻസ്ഫർ ജാലകത്തിൽ ബാഴ്സലോണയിലേക്ക് ചേക്കേറാൻ താല്പര്യപ്പെടുന്നതായി റിപ്പോർട്ട്. മുണ്ടോ ഡിപ്പോർട്ടീവോയാണ് ഇക്കാര്യം പുറത്തുവിട്ടത്.

നിക്കോ വില്യംസിനെ ടീമിലെത്തിക്കാനുള്ള ബാഴ്സലോണയുടെ ശ്രമങ്ങൾ പരാജയപ്പെട്ടതിന് പിന്നാലെയാണ് ലിയാവോയിലേക്ക് ക്ലബ്ബിന്റെ ശ്രദ്ധ തിരിഞ്ഞത്. നേരത്തെ സാമ്പത്തിക പ്രതിസന്ധികൾ കാരണം ഈ നീക്കം തടസ്സപ്പെട്ടിരുന്നുവെങ്കിലും, വരാനിരിക്കുന്ന ട്രാൻസ്ഫർ വിപണിയിൽ സാഹചര്യം അനുകൂലമാകുമെന്നാണ് വിലയിരുത്തൽ.

മാനേജർ മാസിമിലിയാനോ അലെഗ്രിയുമായുള്ള അഭിപ്രായവ്യത്യാസങ്ങൾ കാരണം ഇറ്റലിയിലെ ലിയാവോയുടെ ഭാവി അനിശ്ചിതത്വത്തിലാണ്. 26 വയസ്സുകാരനായ താരം പലപ്പോഴും പ്ലെയിംഗ് ഇലവനിൽ സ്ഥാനം ലഭിക്കാതെ ബെഞ്ചിൽ ഇരിക്കേണ്ടി വരുന്നത് അദ്ദേഹത്തെ അലട്ടുന്നുണ്ട്.

ഇതിനിടെ, ബാഴ്സലോണ ഇതിഹാസം റൊണാൾഡീഞ്ഞോയെ കുറിച്ച് ലിയാവോ സോഷ്യൽ മീഡിയയിൽ പങ്കുവെച്ച പോസ്റ്റ് അഭ്യൂഹങ്ങൾക്ക് ആക്കം കൂട്ടിയിട്ടുണ്ട്. റൊണാൾഡീഞ്ഞോയെ “ഏറ്റവും മികച്ച താരം” എന്ന് വിശേഷിപ്പിച്ചുകൊണ്ട് താരം പങ്കുവെച്ച കുറിപ്പ് ബാഴ്സലോണയോടുള്ള അദ്ദേഹത്തിന്റെ താല്പര്യമായിട്ടാണ് പലരും കാണുന്നത്.

കളിക്കാരനും എസി മിലാനും ഈ കരാറിന് അനുകൂലമാണെങ്കിലും, മാർക്കസ് റാഷ്ഫോർഡുമായി ബന്ധപ്പെട്ട വിഷയങ്ങൾ ഉൾപ്പെടെയുള്ള ക്ലബ്ബിന്റെ ആഭ്യന്തര കാര്യങ്ങളിൽ തീരുമാനമെടുത്തതിന് ശേഷം മാത്രമേ ബാഴ്സലോണ ഔദ്യോഗികമായി മുന്നോട്ട് പോകുകയുള്ളൂ.