പ്രീമിയർ ലീഗ് 33-ാം മത്സരദിനത്തിൽ മാഞ്ചസ്റ്റർ സിറ്റിയോട് 1-2 എന്ന സ്കോറിന് ആഴ്‌സനൽ തോൽവി വഴങ്ങിയിട്ടും, ടീമിന്റെ കിരീട സാധ്യതയിൽ ഉറച്ചുനിൽക്കുകയാണ് പ്രമുഖ ടിവി അവതാരകനും ആഴ്‌സനൽ ആരാധകനുമായ പിയേഴ്സ് മോർഗൻ.

നിലവിൽ പോയിന്റ് പട്ടികയിൽ ആഴ്‌സനലിനേക്കാൾ മൂന്ന് പോയിന്റ് മാത്രം പിന്നിലാണ് മാഞ്ചസ്റ്റർ സിറ്റി. ഒരു മത്സരം കുറച്ചേ സിറ്റി കളിച്ചിട്ടുള്ളൂ എന്നതും ശ്രദ്ധേയമാണ്. പ്രീമിയർ ലീഗ് പോയിന്റ് പട്ടിക പങ്കുവെച്ചുകൊണ്ട് കിരീടപ്പോരാട്ടത്തെക്കുറിച്ച് പിയേഴ്സ് മോർഗൻ തന്റെ അഭിപ്രായം വ്യക്തമാക്കി.

“ആഴ്‌സനൽ ഇപ്പോഴും ഒന്നാമതാണ്, അവർ തന്നെ ലീഗ് നേടുകയും ചെയ്യും. സിറ്റി രണ്ടാമത് തുടരുന്നു. മാഞ്ചസ്റ്റർ യുണൈറ്റഡിന് കാര്യമായ പ്രസക്തിയില്ല. കഴിഞ്ഞ വർഷത്തെ അപേക്ഷിച്ച് ലിവർപൂൾ പകുതി മികവ് മാത്രമേ കാണിക്കുന്നുള്ളൂ, ചെൽസി തീർത്തും മോശമാണ്, ടോട്ടനം തരംതാഴ്ത്തപ്പെടും,” അദ്ദേഹം കുറിച്ചു.

“സ്നേഹത്തോടെ, ബോട്ടിൽ-ജോബ്😘,” എന്നും പിയേഴ്സ് കൂട്ടിച്ചേർത്തു.