ബാഴ്സലോണ അത്‌ലെറ്റിക് പ്രതിരോധതാരം പാട്രിസിയോ പാസഫിക്കോയുടെ പരിക്ക് ഗുരുതരമെന്ന് റിപ്പോർട്ട്. മാധ്യമപ്രവർത്തകനായ ജോർഡി കാർഡെറോയാണ് താരത്തിന്റെ പരിക്കിനെക്കുറിച്ചുള്ള വിവരങ്ങൾ പുറത്തുവിട്ടത്.

യുഇ ഒലോട്ടിനെതിരായ മത്സരത്തിന്റെ അവസാന മിനിറ്റുകളിൽ മുട്ടിന് പരിക്കേറ്റതിനെത്തുടർന്ന് ഇരുപതുകാരനായ താരം വേദനയോടെയാണ് കളം വിട്ടത്.

ഏറ്റവും മോശമായ സാഹചര്യത്തിൽ താരത്തിന് ലിഗമെന്റ് പരിക്കേറ്റതാകാൻ സാധ്യതയുണ്ടെന്ന് കാർഡെറോ വ്യക്തമാക്കുന്നു. നാളെ നടക്കുന്ന വിശദമായ പരിശോധനകൾക്ക് ശേഷമേ പരിക്കിന്റെ തീവ്രതയിൽ വ്യക്തത വരൂ.

വിന്റർ ട്രാൻസ്ഫർ വിൻഡോയിൽ ഡിഫൻസർ സ്പോർട്ടിംഗിൽ നിന്ന് ലോൺ അടിസ്ഥാനത്തിലാണ് ഉറുഗ്വേയൻ താരമായ പാസഫിക്കോ ബാഴ്സലോണയിലെത്തിയത്. റിസർവ് ടീമിനായി മികച്ച പ്രകടനം കാഴ്ചവെച്ച താരം ഇതിനോടകം തന്നെ സീനിയർ ടീമിനൊപ്പം പരിശീലനവും നടത്തിയിട്ടുണ്ട്.

താരത്തെ സ്ഥിരമായി ടീമിലെടുക്കാൻ ബാഴ്സലോണ നേരത്തെ തീരുമാനിച്ചിരുന്നു. എന്നാൽ പരിക്കിന്റെ പശ്ചാത്തലത്തിൽ ഈ തീരുമാനത്തിൽ മാറ്റം വരുമോ എന്നത് കാത്തിരുന്ന് കാണേണ്ടതാണ്.