കടുത്ത ഫോം ഔട്ട്; ഇൻസ്റ്റാഗ്രാമിൽ നിന്ന് വിട്ടുനിൽക്കാൻ തീരുമാനിച്ച് റാഫേൽ ലിയാവോ
എസി മിലാന് വേണ്ടി കളിക്കുന്ന പോർച്ചുഗീസ് താരം റാഫേൽ ലിയാവോ തന്റെ കരിയറിലെ ഏറ്റവും പ്രയാസകരമായ ഘട്ടത്തിലൂടെയാണ് കടന്നുപോകുന്നത്.
മാർച്ച് ഒന്നിന് ശേഷം ഒരു ഗോൾ പോലും നേടാൻ ലിയാവോയ്ക്ക് കഴിഞ്ഞിട്ടില്ല. കഴിഞ്ഞ രണ്ട് മാസത്തിനിടെ റോസോനെറിക്ക് വേണ്ടി ഒരു അസിസ്റ്റ് മാത്രമാണ് താരത്തിന് നൽകാൻ സാധിച്ചത്. മിലാൻ 1-0ന് വിജയിച്ച മത്സരത്തിൽ റാബിയോട്ടിനായി നൽകിയ ആ പാസിന് ശേഷം മികച്ച പ്രകടനം പുറത്തെടുക്കാൻ ലിയാവോയ്ക്ക് സാധിച്ചില്ല. ഇതിനെത്തുടർന്ന് സാൻ സിറോയിലെ ആരാധകരിൽ നിന്ന് വലിയ വിമർശനങ്ങളും കൂവലുകളും താരത്തിന് നേരിടേണ്ടി വന്നു.
ഈ സാഹചര്യത്തിലാണ് സോഷ്യൽ മീഡിയയിൽ നിന്ന് താൽക്കാലികമായി വിട്ടുനിൽക്കാൻ ലിയാവോ തീരുമാനിച്ചത്. നിലവിൽ ഇൻസ്റ്റാഗ്രാമിൽ താരം സജീവമല്ല.
നേരത്തെ ആരാധകരുമായി സംവദിക്കാനും തന്റെ വികാരങ്ങൾ പങ്കുവെക്കാനും മിലാൻ ക്ലബ്ബിനെ ലക്ഷ്യമാക്കി സന്ദേശങ്ങൾ നൽകാനും ലിയാവോ സോഷ്യൽ മീഡിയയെ ഉപയോഗിച്ചിരുന്നു. ഡിജിറ്റൽ ലോകത്തുനിന്നുള്ള ഈ താൽക്കാലിക ഇടവേള, കൂടുതൽ ശ്രദ്ധ കേന്ദ്രീകരിച്ച് കളിക്കളത്തിലേക്ക് മടങ്ങിവരാൻ താരത്തെ സഹായിക്കുമെന്നാണ് വിലയിരുത്തപ്പെടുന്നത്.