മാഞ്ചസ്റ്റർ സിറ്റിക്കെതിരായ പ്രീമിയർ ലീഗ് മത്സരത്തിനിടെ ആൻ്റോയിൻ സെമെന്യോയ്‌ക്കെതിരെ വംശീയ അധിക്ഷേപം നടത്തിയ സംഭവത്തിൽ എവർട്ടൺ ആരാധകൻ അറസ്റ്റിലായി. 3-3 എന്ന സ്കോറിൽ സമനിലയിൽ പിരിഞ്ഞ മത്സരത്തിനിടെയാണ് സംഭവം.

തിങ്കളാഴ്ച രാത്രി ഹിൽ ഡിക്കിൻസൺ സ്റ്റേഡിയത്തിലായിരുന്നു സംഭവം നടന്നത്. സ്റ്റേഡിയത്തിലെ ജീവനക്കാരുടെയും മറ്റ് കാണികളുടെയും പരാതിയെത്തുടർന്ന് വംശീയ അധിക്ഷേപം നടത്തിയെന്ന സംശയത്തിൽ 71 വയസ്സുകാരനെ മെഴ്‌സിസൈഡ് പോലീസ് കസ്റ്റഡിയിലെടുത്തു.

എവർട്ടൺ ഫുട്ബോൾ ക്ലബ്ബ് പുറത്തിറക്കിയ പ്രസ്താവനയിൽ ഇക്കാര്യം സ്ഥിരീകരിച്ചു. എതിർ ടീം താരത്തിനെതിരെ വംശീയ അധിക്ഷേപം ഉണ്ടായതിനെത്തുടർന്നാണ് നടപടിയെന്ന് ക്ലബ്ബ് വ്യക്തമാക്കി.

സംഭവത്തിൽ മെഴ്‌സിസൈഡ് പോലീസ് 71 വയസ്സുകാരനെ അറസ്റ്റ് ചെയ്യുകയും പിന്നീട് ഇയാൾക്ക് ജാമ്യം അനുവദിക്കുകയും ചെയ്തു. എന്നാൽ, മത്സരങ്ങൾക്ക് നാല് മണിക്കൂർ മുൻപും ശേഷവും ഏതെങ്കിലും കായിക സ്റ്റേഡിയത്തിൻ്റെ ഒരു മൈൽ ചുറ്റളവിൽ പ്രവേശിക്കരുതെന്ന കർശന ഉപാധികളോടെയാണ് ജാമ്യം നൽകിയിരിക്കുന്നത്.

ഏതൊരു രൂപത്തിലുള്ള വംശീയതയും വിവേചനവും അംഗീകരിക്കാനാവില്ലെന്ന് എവർട്ടൺ അറിയിച്ചു. ഇത്തരം പെരുമാറ്റങ്ങൾ തങ്ങളുടെ സ്റ്റേഡിയങ്ങളിലോ കായിക രംഗത്തോ സമൂഹത്തിലോ ഒരിടത്തും അനുവദിക്കില്ലെന്നും ക്ലബ്ബ് വ്യക്തമാക്കി.

മറ്റ് ആരാധകരുടെയും സ്റ്റേഡിയം ജീവനക്കാരുടെയും പോലീസിൻ്റെയും പെട്ടെന്നുള്ള ഇടപെടലാണ് പ്രതിയെ തിരിച്ചറിയാനും നടപടി സ്വീകരിക്കാനും സഹായിച്ചത്. വിഷയത്തിൽ അന്വേഷണവുമായി പൂർണ്ണമായി സഹകരിക്കുമെന്നും ക്ലബ്ബിൻ്റെ സീറോ ടോളറൻസ് നയത്തിനനുസരിച്ചുള്ള കടുത്ത നടപടികൾ സ്വീകരിക്കുമെന്നും എവർട്ടൺ വ്യക്തമാക്കി.