ലിസ്ബൺ വമ്പന്മാരായ ബെൻഫിക്കയുടെ പുതിയ മുഖ്യ പരിശീലകനായി മാർക്കോ സിൽവ ചുമതലയേൽക്കും. ക്ലബ്ബുമായി അദ്ദേഹം രണ്ട് വർഷത്തെ കരാറിൽ പൂർണ്ണ ധാരണയിലെത്തിയതായാണ് റിപ്പോർട്ടുകൾ സൂചിപ്പിക്കുന്നത്.

ഈ സീസൺ അവസാനത്തോടെ മാർക്കോ സിൽവ ഫുൾഹാം വിടും. ക്രേവൻ കോട്ടേജിലെ അഞ്ച് വർഷത്തെ വിജയകരമായ കാലയളവിന് ശേഷമാണ് അദ്ദേഹം ക്ലബ്ബ് വിടുന്നത്. ഫുൾഹാമിനെ പ്രീമിയർ ലീഗിലെ സ്ഥിരതയുള്ള ടീമായി മാറ്റുന്നതിൽ അദ്ദേഹം നിർണ്ണായക പങ്കുവഹിച്ചിരുന്നു.

ചെൽസി ഉൾപ്പെടെയുള്ള നിരവധി ക്ലബ്ബുകൾ സിൽവയെ സമീപിച്ചിരുന്നു. ഫുൾഹാം മൂന്ന് വർഷത്തെ കരാർ നീട്ടാനും അദ്ദേഹത്തിന് അവസരം നൽകിയിരുന്നു.

എങ്കിലും, സ്വന്തം നാട്ടിലേക്ക് മടങ്ങാനും കിരീടങ്ങൾക്കായി മത്സരിക്കാനും, യുവേഫ ചാമ്പ്യൻസ് ലീഗിൽ കളിക്കാനുമുള്ള അവസരവുമാണ് 48-കാരനായ സിൽവ മുൻഗണന നൽകിയത്.

ഹോസെ മൗറീഞ്ഞോ ബെൻഫിക്ക വിട്ട് റയൽ മാഡ്രിഡിലേക്ക് മടങ്ങാൻ തയ്യാറെടുക്കുന്ന സാഹചര്യത്തിലാണ് സിൽവയുടെ ഈ നീക്കം.

പ്രീമിയർ ലീഗിലെ അവസാന മത്സരത്തിൽ ന്യൂകാസിൽ യുണൈറ്റഡിനെതിരെയാകും സിൽവ ഫുൾഹാമിനെ അവസാനമായി പരിശീലിപ്പിക്കുക. വരും ദിവസങ്ങളിൽ ബെൻഫിക്ക ഔദ്യോഗികമായി അദ്ദേഹത്തിന്റെ നിയമനം പ്രഖ്യാപിക്കും.