ലോകകപ്പിന് ശേഷം ഉറുഗ്വേ ദേശീയ ഫുട്ബോൾ ടീമിന്റെ മുഖ്യ പരിശീലക സ്ഥാനം ഒഴിയുമെന്ന് മാർസെലോ ബിയൽസ സ്ഥിരീകരിച്ചു. വ്യാഴാഴ്ച വൈകുന്നേരം ഉറുഗ്വേ ഫുട്ബോൾ അസോസിയേഷൻ സംഘടിപ്പിച്ച വാർത്താസമ്മേളനത്തിലാണ് അദ്ദേഹം ഇക്കാര്യം അറിയിച്ചത്.

“ലോകകപ്പോടെ ഞങ്ങളുടെ ജോലി അവസാനിക്കും. ഏതൊരു കായിക വിദഗ്ദ്ധന്റെയും കരിയറിൽ ലോകകപ്പിൽ പങ്കാളിയാകാൻ കഴിയുന്നത് ഒരു അത്ഭുതകരമായ കാര്യമാണ്. ലോകകപ്പ് പോലുള്ള ഒരു ടൂർണമെന്റിൽ പങ്കെടുക്കാൻ അവസരം നൽകിയതിന് ഉറുഗ്വെയോട് ഞാൻ എന്നെന്നും കടപ്പെട്ടിരിക്കും,” ഉറുഗ്വേ പരിശീലകൻ പറഞ്ഞു.

2023 മെയ് മാസത്തിൽ ആരംഭിച്ച പരിശീലക വേഷമാണ് ബിയൽസയുടെ പടിയിറക്കത്തോടെ അവസാനിക്കുന്നത്. ഉറുഗ്വേ ടീമിന്റെ ചുമതലയേറ്റെടുത്ത ശേഷം 35 മത്സരങ്ങളിലാണ് ഈ അർജന്റീനക്കാരൻ പരിശീലകനായിരുന്നത്. ഇതിൽ 15 വിജയങ്ങളും 13 സമനിലകളും 7 തോൽവികളും ടീം നേടിയിട്ടുണ്ട്.