ജൂണിൽ നടക്കാനിരിക്കുന്ന ഗ്രീസ്, ലക്സംബർഗ് എന്നിവർക്കെതിരായ സൗഹൃദ മത്സരങ്ങൾക്കുള്ള ഇറ്റാലിയൻ ഫുട്ബോൾ ടീമിലേക്ക് ബൊറൂസിയ ഡോർട്ട്മുണ്ടിന്റെ മുന്നേറ്റനിര താരം സാമുവൽ ഇനാഷിയോയെ ഇറ്റലിയുടെ ഇടക്കാല പരിശീലകൻ സിൽവിയോ ബാൾഡിനി ഉൾപ്പെടുത്തിയേക്കും.

ലോകകപ്പിന് യോഗ്യത നേടാൻ സാധിക്കാത്ത സാഹചര്യത്തിൽ, പ്രമുഖ താരങ്ങളെ ഒഴിവാക്കി യുവനിരയെ പരീക്ഷിക്കാനാണ് അസൂറികൾ ലക്ഷ്യമിടുന്നത്. കയോഡെ, ബർട്ടെസാഗി, അഹാനോർ, എൻഡോർ, കസാദി, കൊളിയോഷോ, പലസ്ട്ര, പിസില്ലി, ഫ്രാൻസെസ്കോ പിയോ എസ്പോസിറ്റോ എന്നിവരടങ്ങുന്നതാകും ടീമിന്റെ പ്രധാന നിര.

യൂത്ത് തലത്തിലെ മികച്ച പ്രകടനത്തിന് ശേഷം ഈ സീസണിലാണ് 18 വയസ്സുകാരനായ ഇനാഷിയോ ബൊറൂസിയ ഡോർട്ട്മുണ്ടിന്റെ സീനിയർ ടീമിൽ ഇടംപിടിച്ചത്. ഈ മാസം ആദ്യം ഐൻട്രാക്റ്റ് ഫ്രാങ്ക്ഫർട്ടിനെതിരെ താരം തന്റെ കന്നി ഗോൾ നേടിയിരുന്നു.

ലാസിയോയുടെ ഗോൾകീപ്പർ എഡോർഡോ മോട്ടയ്ക്കും അസൂറികളിൽ നിന്ന് വിളി ലഭിക്കാൻ സാധ്യതയുണ്ട്.