ലാലിഗ സീസണിലെ അവസാന റൗണ്ട് മത്സരത്തിൽ വിയ്യാറയലിനെതിരെ അത്ലറ്റികോ മാഡ്രിഡ് 5-1 എന്ന സ്കോറിന് പരാജയപ്പെട്ടു. അത്ലറ്റികോ മാഡ്രിഡിന്റെ പരിശീലകനായി ഡിയാഗോ സിമിയോണി ചുമതലയേറ്റ ശേഷം ഒരു മത്സരത്തിൽ അഞ്ച് ഗോളുകൾ വഴങ്ങുന്ന രണ്ടാമത്തെ സന്ദർഭമാണിത്.

അർജന്റീനക്കാരനായ സിമിയോണിക്ക് കീഴിൽ ഇതിനുമുമ്പ് ഇങ്ങനെയൊരു അനുഭവം ഉണ്ടായത് 2024 ജനുവരിയിലാണ്. സ്പാനിഷ് സൂപ്പർ കപ്പ് സെമിഫൈനലിൽ റയൽ മാഡ്രിഡിനെതിരെ അധികസമയത്ത് 5-3 എന്ന സ്കോറിനായിരുന്നു അത്ലറ്റികോ അന്ന് പരാജയപ്പെട്ടത്.

2011 ഡിസംബറിൽ ക്ലബ്ബിന്റെ ചുമതലയേറ്റ ശേഷം സിമിയോണി ആകെ 800 മത്സരങ്ങളിൽ അത്ലറ്റികോ മാഡ്രിഡിനെ നയിച്ചിട്ടുണ്ട്. ലാലിഗയിൽ ഇതിനുമുമ്പ് 2011 സെപ്റ്റംബറിലാണ് അത്ലറ്റികോ അഞ്ച് ഗോളുകൾ വഴങ്ങിയത്. അന്ന് പരിശീലകൻ ഗ്രിഗോറിയോ മൻസാനോയുടെ കീഴിൽ ബാഴ്‌സലോണയോട് ക്യാമ്പ് നൗവിൽ വെച്ച് 5-0 എന്ന സ്കോറിനാണ് അവർ തോറ്റത്.