മാർക്ക (MARCA) റിപ്പോർട്ട് പ്രകാരം, ബാഴ്‌സലോണ പരിശീലകൻ ഹാൻസി ഫ്ലിക്ക് മാർക്കസ് റാഷ്ഫോർഡുമായി നേരിട്ട് സംസാരിച്ചു. 2026-27 സീസണിൽ തനിക്ക് റാഷ്ഫോർഡിനെ ടീമിൽ വേണമെന്ന് ഫ്ലിക്ക് ഇംഗ്ലീഷ് താരത്തെ അറിയിച്ചു.

നിലവിൽ മാഞ്ചസ്റ്റർ യുണൈറ്റഡിൽ നിന്ന് ലോൺ അടിസ്ഥാനത്തിൽ ബാഴ്‌സലോണയിൽ കളിക്കുന്ന 28-കാരനായ ഈ വിങ്ങർ, ക്ലബ്ബിൽ തുടരാൻ പൂർണ്ണ തീരുമാനത്തിലാണ്. ഓൾഡ് ട്രാഫോർഡിലേക്കുള്ള തിരിച്ചുവരവോ മറ്റ് ക്ലബ്ബുകളിലേക്കുള്ള കൂടുമാറ്റമോ താരം തള്ളിക്കളഞ്ഞു.

ഹാൻസി ഫ്ലിക്കിന് കീഴിൽ മികച്ച പ്രകടനമാണ് റാഷ്ഫോർഡ് കാഴ്ചവെച്ചത്. ഈ സീസണിൽ എല്ലാ മത്സരങ്ങളിലുമായി 49 മത്സരങ്ങളിൽ ബൂട്ടണിഞ്ഞ താരം, 14 ഗോളുകളും 14 അസിസ്റ്റുകളും നേടി മികച്ച ഫോമിലാണ്.

എങ്കിലും റാഷ്ഫോർഡിന്റെ ബാഴ്‌സലോണയിലെ സ്ഥിരസാന്നിധ്യം ഉറപ്പായിട്ടില്ല. കരാറിലുള്ള 30 ദശലക്ഷം യൂറോ എന്ന പർച്ചേസ് ഓപ്ഷൻ നൽകാൻ ബാഴ്‌സലോണ തയ്യാറല്ല. പകരം, താരത്തിന്റെ മൂല്യം കുറയ്ക്കാനോ വീണ്ടും ലോൺ അടിസ്ഥാനത്തിൽ നിലനിർത്താനോ ആണ് ക്ലബ്ബ് ശ്രമിക്കുന്നത്.

എന്നാൽ, താരത്തെ സ്ഥിരമായി വിൽക്കാനാണ് മാഞ്ചസ്റ്റർ യുണൈറ്റഡ് ആഗ്രഹിക്കുന്നത്. ഇതിനകം തന്നെ പ്രമുഖ ക്ലബ്ബുകളിൽ നിന്ന് അവർക്ക് മികച്ച ഓഫറുകൾ ലഭിച്ചിട്ടുണ്ട്. വരാനിരിക്കുന്ന ലോകകപ്പിലൂടെ റാഷ്ഫോർഡിന്റെ വിപണി മൂല്യം ഇനിയും വർധിക്കുമെന്ന പ്രതീക്ഷയിലാണ് യുണൈറ്റഡ്.

ബാഴ്‌സലോണയിലേക്ക് മാറാൻ വേണ്ടി, മാഞ്ചസ്റ്റർ യുണൈറ്റഡിൽ ലഭിക്കുന്നതിനേക്കാൾ കുറഞ്ഞ ശമ്പളം വാങ്ങാനും റാഷ്ഫോർഡ് തയ്യാറാണ്. ആരാധകരും സഹതാരങ്ങളും കൂടാതെ ഹാൻസി ഫ്ലിക്കും തന്നെ വലിയ തോതിൽ വിലമതിക്കുന്നുണ്ടെന്ന തോന്നലാണ് താരത്തെ ഇതിന് പ്രേരിപ്പിക്കുന്നത്.