ഈ വാരാന്ത്യത്തിൽ നടക്കുന്ന ചാമ്പ്യൻസ് ലീഗ് ഫൈനലിലെ പ്രധാന താരങ്ങളെക്കുറിച്ച് മുൻ പിഎസ്ജി ഗോൾകീപ്പർ സെർജിയോ റിക്കോ മനസ്സ് തുറക്കുന്നു.

ഉസ്മാൻ ഡെംബെലെ, വിറ്റിന്യ, ആഴ്‌സണൽ ഗോൾകീപ്പർ ഡേവിഡ് റായ എന്നിവരെക്കുറിച്ചാണ് സ്പാനിഷ് ഗോൾകീപ്പറായ റിക്കോ തന്റെ അഭിപ്രായങ്ങൾ പങ്കുവെച്ചത്.

ഡെംബെലെയെക്കുറിച്ച് സംസാരിക്കവേ റിക്കോ ഇങ്ങനെ പറഞ്ഞു: “അദ്ദേഹം ലോകത്തിലെ ഏറ്റവും മികച്ച കളിക്കാരിൽ ഒരാളാണ്. അദ്ദേഹത്തിന്റെ കഴിവ് ചോദ്യം ചെയ്യപ്പെടാനാവാത്തതാണ്. ഓരോ മത്സരത്തിലും ഡെംബെലെ അത് തെളിയിക്കുന്നുണ്ട്. അദ്ദേഹം അർഹിക്കുന്ന നേട്ടങ്ങൾ കൈവരിക്കുന്നതിൽ എനിക്ക് അതിയായ സന്തോഷമുണ്ട്. മികച്ച കഴിവുള്ള താരമാണ് അദ്ദേഹം, ഇപ്പോൾ കാര്യങ്ങൾ അദ്ദേഹത്തിന് അനുകൂലമായി വരുന്നു.”

വിറ്റിന്യയുടെ പ്രകടനത്തെക്കുറിച്ചും റിക്കോ വാചാലനായി. “അദ്ദേഹം മികച്ച ഫോമിലാണ് കളിക്കുന്നത്. പിഎസ്ജിയിൽ എത്തിയപ്പോൾ തന്നെ അസാധാരണമായ കഴിവുള്ള താരമാണെന്ന് വിറ്റിന്യ തെളിയിച്ചിരുന്നു. തുടക്കത്തിൽ ടീമുമായി ഇണങ്ങിചേരാൻ സമയം ആവശ്യമായി വന്നതുകൊണ്ട് അധിക സമയം കളിക്കാൻ സാധിച്ചിരുന്നില്ല. എന്നാൽ ഇപ്പോൾ അവിശ്വസനീയമായ ഫുട്‌ബോൾ ആണ് അദ്ദേഹം പുറത്തെടുക്കുന്നത്. ഒരു സമ്പൂർണ്ണ താരമാണെന്ന് അദ്ദേഹം തെളിയിച്ചു കൊണ്ടിരിക്കുകയാണ്,” റിക്കോ കൂട്ടിച്ചേർത്തു.

അവസാനമായി, സ്പെയിൻകാരനായ സഹതാരം ഡേവിഡ് റായയെക്കുറിച്ചും റിക്കോ സംസാരിച്ചു.

“കഴിഞ്ഞ കുറച്ചു വർഷങ്ങളായി ഡേവിഡ് റായ മികച്ച പ്രകടനമാണ് നടത്തുന്നത്. ഇപ്പോൾ അദ്ദേഹം എത്തിനിൽക്കുന്ന നിലവാരം വളരെ മതിപ്പുളവാക്കുന്നതാണ്. അദ്ദേഹത്തിന്റെ പ്രകടനം അവിശ്വസനീയമാണ്,” റിക്കോ അഭിപ്രായപ്പെട്ടു.

“റായ കാണിക്കുന്ന നിലവാരം അമ്പരപ്പിക്കുന്നതാണ്, അത് കണ്ട് ‘അതിശയം’ എന്ന് മാത്രമേ പറയാനുള്ളൂ,” റിക്കോ പറഞ്ഞു.