സസുളോയുടെ അറ്റാക്കിംഗ് മിഡ്‌ഫീൽഡർ ക്രിസ്റ്റ്യൻ വോൾപാറ്റോ തന്റെ അന്താരാഷ്ട്ര ഫുട്ബോൾ കരിയറിൽ നിർണ്ണായക മാറ്റം വരുത്തുന്നു. ഇറ്റലിക്ക് വേണ്ടി കളിച്ചിരുന്ന താരം ഇനി ഓസ്‌ട്രേലിയൻ ദേശീയ ടീമിനെ പ്രതിനിധീകരിക്കുമെന്ന് ബിബിസി റിപ്പോർട്ട് ചെയ്യുന്നു.

വരാനിരിക്കുന്ന 2026 ലോകകപ്പിൽ ഓസ്‌ട്രേലിയൻ ടീമിന്റെ ഭാഗമാകാനുള്ള ലക്ഷ്യത്തോടെയാണ് വോൾപാറ്റോ ഈ തീരുമാനം കൈക്കൊണ്ടിരിക്കുന്നത്.

സിഡ്‌നിയിൽ ജനിച്ചുവളർന്ന 22-കാരനായ വോൾപാറ്റോയ്ക്ക് ഇരട്ട പൗരത്വമുണ്ട്. 2020-ൽ റോമയുടെ യൂത്ത് അക്കാദമിയിൽ ചേരാൻ ഇറ്റലിയിലേക്ക് താമസം മാറിയ ഇദ്ദേഹം 2023 മുതൽ സസുളോയ്ക്ക് വേണ്ടിയാണ് കളിക്കുന്നത്. ഇതിനുമുമ്പ് വിവിധ യൂത്ത് തലങ്ങളിൽ ഇറ്റലിയെ പ്രതിനിധീകരിക്കാൻ വോൾപാറ്റോയ്ക്ക് സാധിച്ചിട്ടുണ്ട്.

ഇറ്റലിയുടെ യൂത്ത് ടീമുകളിൽ മാത്രം കളിച്ചതിനാൽ, ഫിഫയുടെ നിബന്ധനകൾ പ്രകാരം ടീം മാറാനുള്ള യോഗ്യത വോൾപാറ്റോയ്ക്കുണ്ട്. കൃത്യമായ വ്യവസ്ഥകൾക്ക് വിധേയമായി കളിക്കാർക്ക് ദേശീയ ടീമുകൾ മാറാൻ ഫിഫ അനുമതി നൽകുന്നു.

ഓസ്‌ട്രേലിയയുടെ പ്രിലിമിനറി സ്ക്വാഡിൽ മിഡ്‌ഫീൽഡർ ഇതിനകം ഇടംപിടിച്ചു കഴിഞ്ഞു. ജൂൺ ഒന്നിന് ഓസ്‌ട്രേലിയ തങ്ങളുടെ അന്തിമ ലോകകപ്പ് ടീമിനെ പ്രഖ്യാപിക്കും. മെയ് 29-നാണ് ഓസ്‌ട്രേലിയൻ ദേശീയ ടീമിലേക്കുള്ള വോൾപാറ്റോയുടെ മാറ്റത്തിന് ഫിഫ ഔദ്യോഗികമായി അംഗീകാരം നൽകിയത്.

2022 ഖത്തർ ലോകകപ്പിൽ ഓസ്‌ട്രേലിയക്ക് വേണ്ടി കളിക്കാൻ അവസരം ലഭിച്ചെങ്കിലും അന്ന് താരം അത് നിരസിച്ചിരുന്നു. ഇറ്റലിയിലെ തന്റെ ക്ലബ്ബ് കരിയറിൽ ശ്രദ്ധ കേന്ദ്രീകരിക്കണമെന്നും പെട്ടെന്നുള്ള തീരുമാനങ്ങൾ എടുക്കാൻ ആഗ്രഹിക്കുന്നില്ലെന്നും അദ്ദേഹം അന്ന് വ്യക്തമാക്കിയിരുന്നു. ഈ വർഷം ആദ്യം ഓസ്‌ട്രേലിയൻ മാനേജർ സമീപിച്ചപ്പോഴും ‘ഇറ്റലിക്ക് വേണ്ടി കാത്തിരിക്കാൻ’ താൻ തയ്യാറാണെന്നായിരുന്നു വോൾപാറ്റോ പറഞ്ഞിരുന്നത്.

അമേരിക്ക, മെക്സിക്കോ, കാനഡ എന്നിവിടങ്ങളിലായി ജൂൺ 11 മുതൽ ജൂലൈ 19 വരെയാണ് 2026 ഫിഫ ലോകകപ്പ് നടക്കുന്നത്. തുർക്കി, അമേരിക്ക, പരാഗ്വേ എന്നിവരുൾപ്പെട്ട ഗ്രൂപ്പിലാണ് ഓസ്‌ട്രേലിയ ഇടംപിടിച്ചിരിക്കുന്നത്.