അടുത്ത ആഴ്ച നടക്കാനിരിക്കുന്ന റയൽ മാഡ്രിഡ് പ്രസിഡന്റ് തിരഞ്ഞെടുപ്പിൽ വിജയിച്ചാൽ, ക്ലബ്ബിന്റെ ഉടമസ്ഥാവകാശ ഘടനയിൽ വലിയ മാറ്റങ്ങൾ കൊണ്ടുവരുമെന്ന് ഫ്ലോറന്റീനോ പെരസ് പ്രഖ്യാപിച്ചു.

റയൽ മാഡ്രിഡിന്റെ സാമ്പത്തിക ഉടമസ്ഥാവകാശം ഒരു റഫറണ്ടത്തിലൂടെ ക്ലബ്ബ് അംഗങ്ങൾക്ക് കൈമാറുന്നതിനാണ് താൻ മുൻഗണന നൽകുന്നതെന്ന് അദ്ദേഹം പറഞ്ഞു.

“ഞാൻ ഒരു ലക്ഷത്തോളം വരുന്ന അംഗങ്ങൾക്ക് ക്ലബ്ബിന്റെ സാമ്പത്തിക ഉടമസ്ഥാവകാശം നൽകാൻ പോവുകയാണ്. റയൽ മാഡ്രിഡ് ആരാധകനാവുക എന്നത് കേവലം വൈകാരികമായ ഒന്നായി മാത്രം ഇനി തുടരില്ല, മറിച്ച് ക്ലബ്ബിന്റെ ആജീവനാന്ത ഉടമകളായി അവർ മാറുമെന്ന്,” പെരസ് വ്യക്തമാക്കി.

നിലവിലെ രീതി അംഗങ്ങളുടെ ഉടമസ്ഥാവകാശത്തെ തലമുറകളിലേക്ക് സംരക്ഷിക്കുന്നില്ലെന്ന് പെരസ് വാദിക്കുന്നു.

“ഒരാൾ മരിച്ചാൽ അവിടംകൊണ്ട് റയൽ മാഡ്രിഡുമായുള്ള അദ്ദേഹത്തിന്റെ കഥ അവസാനിക്കുന്നു. അത് സംഭവിക്കാൻ പാടില്ലാത്തതാണ്. അതുകൊണ്ട് ഞാൻ അംഗങ്ങൾക്ക് സാമ്പത്തിക ഉടമസ്ഥാവകാശം നൽകും.”

തിരഞ്ഞെടുപ്പിന് ശേഷം ഉടൻ തന്നെ റഫറണ്ടം നടത്തുമെന്ന് അദ്ദേഹം കൂട്ടിച്ചേർത്തു.

“തിരഞ്ഞെടുപ്പ് കഴിഞ്ഞാലുടൻ, പ്രതിനിധികളുടെ യോഗം വിളിച്ച് റഫറണ്ടം നടത്താനാണ് ഞാൻ ആഗ്രഹിക്കുന്നത്.”

ക്ലബ്ബിന്റെ ചെറിയൊരു ശതമാനം ആസ്തികൾ വിൽക്കാനുള്ള തീരുമാനത്തെ പ്രതിരോധിച്ചുകൊണ്ട് പെരസ് പറഞ്ഞു:

“റയൽ മാഡ്രിഡിന്റെ 5 ശതമാനം ഓഹരി വാങ്ങുന്നവർ ക്ലബ്ബ് നിയന്ത്രിക്കില്ല; അവർ നമ്മുടെ ബ്രാൻഡുമായി ചേർന്ന് പ്രവർത്തിക്കുന്നവരായിരിക്കും.”

“ക്ലബ്ബിന്റെ സാമ്പത്തിക ആസ്തികൾ അതിന്റെ അംഗങ്ങളുടേതാണെന്ന് ഉറപ്പാക്കാതെ ഞാൻ മരിക്കില്ല.”