തുടർച്ചയായി രണ്ടാം തവണയും ചാമ്പ്യൻസ് ലീഗ് കിരീടം ചൂടിയ പാരീസ് സെന്റ് ജെർമെയ്ൻ (പിഎസ്ജി), അർജന്റീനയുടെ മുന്നേറ്റനിര താരം ജൂലിയൻ അൽവാരസിനെ ടീമിലെത്തിക്കാൻ ശ്രമം തുടങ്ങി. ഡിയാരിയോ സ്പോർട്ടിന്റെ റിപ്പോർട്ട് പ്രകാരം, അൽവാരസിനായി ബാഴ്‌സലോണയുമായി കടുത്ത മത്സരത്തിനാണ് പിഎസ്ജി തയ്യാറെടുക്കുന്നത്.

യൂറോപ്യൻ കിരീടം നിലനിർത്തിയതിന് പിന്നാലെ, ടീമിന്റെ ആക്രമണനിര കൂടുതൽ ശക്തമാക്കുന്നതിന്റെ ഭാഗമായാണ് ഫ്രഞ്ച് ക്ലബ്ബിന്റെ നീക്കം.

ആഴ്‌സണലിനെതിരായ ഫൈനൽ മത്സരത്തിന് തൊട്ടുമുമ്പ്, അൽവാരസിന്റെ ഏജന്റായ ഫെർണാണ്ടോ ഹിഡാൽഗോയുമായി പിഎസ്ജി അധികൃതർ കൂടിക്കാഴ്ച നടത്തിയിരുന്നു.

ചാമ്പ്യൻസ് ലീഗ് ഫൈനലിന് മുമ്പ് ടീമിൽ ശ്രദ്ധ കേന്ദ്രീകരിക്കുന്നതിനായി, ഔദ്യോഗിക ചർച്ചകൾ ഫൈനലിന് ശേഷം മതിയെന്ന് നേരത്തെ ക്ലബ്ബ് തീരുമാനിച്ചിരുന്നു.

ഫൈനൽ മത്സരം അവസാനിച്ചതോടെ, പിഎസ്ജിയുടെ ഭാഗത്തുനിന്ന് ഔദ്യോഗികമായ ട്രാൻസ്ഫർ വാഗ്ദാനം ഉടൻ തന്നെ ഉണ്ടാകുമെന്നാണ് സൂചന. അത്‌ലറ്റിക്കോ മാഡ്രിഡ് നൂറു ദശലക്ഷത്തിലധികം തുക ആവശ്യപ്പെട്ടിട്ടും പിഎസ്ജി പിന്മാറാൻ തയ്യാറല്ല.

സാമ്പത്തികമായി കൂടുതൽ കരുത്തരായ പിഎസ്ജി രംഗത്തിറങ്ങിയത്, ഈ സമ്മർ ട്രാൻസ്ഫർ വിൻഡോയിലെ പ്രധാന ലക്ഷ്യമായ അൽവാരസിനെ നഷ്ടപ്പെടുമെന്ന ആശങ്കയിലായ ബാഴ്‌സലോണയ്ക്ക് വലിയ തിരിച്ചടിയാണ്.