തങ്ങളുടെ പ്രതിരോധനിര കൂടുതൽ ശക്തമാക്കുന്നതിന്റെ ഭാഗമായി ലിവർപൂൾ സെന്റർ ബാക്ക് ഇബ്രാഹിമ കൊനാട്ടെയുമായി റയൽ മാഡ്രിഡ് കരാർ ധാരണയിലെത്തിയതായി റിപ്പോർട്ടുകൾ. ഫ്രീ ട്രാൻസ്ഫറിലൂടെ താരത്തെ സ്വന്തമാക്കാനാണ് സ്പാനിഷ് ക്ലബ്ബിന്റെ നീക്കം.

ഒൻഡാ സെറോയുടെ റിപ്പോർട്ട് പ്രകാരം, റയൽ മാഡ്രിഡ് പ്രസിഡന്റ് ഫ്ലോറന്റീനോ പെരസ് ഇതിനകം തന്നെ ഫ്രഞ്ച് താരവുമായി ധാരണയിലെത്തിയിട്ടുണ്ട്. ലിവർപൂളുമായുള്ള കരാർ അവസാനിക്കുന്നതോടെ കൊനാട്ടെ ക്ലബ്ബ് വിടുമെന്നാണ് കരുതപ്പെടുന്നത്.

ലിവർപൂളിൽ തുടരാൻ താരം താൽപ്പര്യപ്പെടുന്നില്ല. പ്രീമിയർ ലീഗ് ക്ലബ്ബുമായുള്ള ചർച്ചകൾ നേരത്തെ അനുകൂലമായിരുന്നെങ്കിലും പുതിയ കരാറിൽ ഒപ്പുവെക്കേണ്ടെന്ന് കൊനാട്ടെ തീരുമാനിക്കുകയായിരുന്നു.

കരാർ പുതുക്കുന്നതിനുള്ള ചർച്ചകൾ അവസാന ഘട്ടത്തിൽ പരാജയപ്പെട്ടു. സാമ്പത്തിക കാര്യങ്ങളിലെ അഭിപ്രായവ്യത്യാസങ്ങളാണ് ചർച്ചകൾ വഴിമുട്ടാൻ പ്രധാന കാരണമായതെന്നാണ് സൂചന.

ഇതോടെ 27-കാരനായ പ്രതിരോധതാരം ഫ്രീ ട്രാൻസ്ഫറിലൂടെ ലഭ്യമാകും. യൂറോപ്പിലെ പ്രമുഖ ക്ലബ്ബുകൾ പലതും താരത്തെ സ്വന്തമാക്കാൻ താല്പര്യം പ്രകടിപ്പിക്കുന്നുണ്ട്.

ഈ സാഹചര്യങ്ങൾ റയൽ മാഡ്രിഡ് വളരെ ശ്രദ്ധയോടെയാണ് നിരീക്ഷിച്ചു വരുന്നത്. താരത്തെ ടീമിലെത്തിക്കുന്നതിൽ കാര്യമായ പുരോഗതി ഉണ്ടായിട്ടുണ്ടെന്നും ഇതിൽ പ്രസിഡന്റ് പെരസിന്റെ ഇടപെടൽ നിർണായകമാണെന്നും റിപ്പോർട്ടുകൾ വ്യക്തമാക്കുന്നു.

റയൽ മാഡ്രിഡിന്റെ പ്രതിരോധ പദ്ധതികൾക്ക് ഏറ്റവും അനുയോജ്യനായ താരമായാണ് കൊനാട്ടെയെ കാണുന്നത്. ഉയർന്ന തലത്തിലുള്ള അനുഭവസമ്പത്തിന് പുറമെ വേഗത, ശാരീരികക്ഷമത, പ്രതിരോധത്തിലെ ജാഗ്രത എന്നിവ താരത്തിന്റെ പ്രത്യേകതകളാണ്. കൂടാതെ, ട്രാൻസ്ഫർ ഫീ ഇല്ലാതെ താരത്തെ ലഭിക്കുന്നത് നിലവിലെ വിപണിയിൽ ക്ലബ്ബിന് വലിയ നേട്ടമായിരിക്കും.