സെവിയ എഫ്‌സിയുടെ (Sevilla FC) ഓഹരി കൈമാറ്റവുമായി ബന്ധപ്പെട്ട ചർച്ചകൾ പരാജയപ്പെട്ടതിന് പിന്നാലെ, ക്ലബ്ബ് ഇതിഹാസം സെർജിയോ റാമോസിനെതിരെ ഗുരുതര ആരോപണങ്ങളുമായി പ്രധാന ഓഹരി ഉടമകൾ രംഗത്ത്. ക്ലബ്ബിന്റെ ഉടമസ്ഥാവകാശവുമായി ബന്ധപ്പെട്ട ചർച്ചകളിൽ റാമോസ് മോശം പെരുമാറ്റം നടത്തിയെന്ന് ചൂണ്ടിക്കാട്ടി ഓഹരി ഉടമകൾ ശക്തമായ പ്രസ്താവന പുറത്തിറക്കി.

നിക്ഷേപകരുമായുള്ള ചർച്ചകൾ അവസാനഘട്ടത്തിൽ തകർന്നതിന് പിന്നാലെയാണ് ഡെൽ നിഡോ ബെനാവെന്റെ, അലെസ്, കാരിയൺ, ഗുജാരോ, കാസ്ട്രോ തുടങ്ങിയ കുടുംബങ്ങൾ ഉൾപ്പെട്ട ഓഹരി ഉടമകൾ റാമോസിനെതിരെ തിരിഞ്ഞത്. മാസങ്ങളായി ആസൂത്രണം ചെയ്ത ഒരു തട്ടിപ്പാണ് ഇതിന് പിന്നിലെന്ന് ഓഹരി ഉടമകൾ ആരോപിക്കുന്നു. ക്ലബ്ബിനോടും ഉടമസ്ഥരോടും റാമോസ് വ്യക്തമായ അനാദരവ് കാട്ടിയെന്നും ഇവർ കുറ്റപ്പെടുത്തുന്നു.

അവർ പ്രസ്താവനയിൽ ഇങ്ങനെ പറയുന്നു:

“ഈ വഞ്ചന മാസങ്ങൾക്ക് മുൻപേ ആസൂത്രണം ചെയ്തതാണ്.”

ചർച്ചകൾക്കിടെയുണ്ടായ വിശ്വാസത്തകർച്ചയിൽ ഓഹരി ഉടമകൾ ഞെട്ടൽ രേഖപ്പെടുത്തി:

“ഫുട്ബോൾ ലോകത്ത് ഇത്രയധികം ആദരിക്കപ്പെടുന്ന റാമോസിനെപ്പോലൊരാൾക്ക് ചേരാത്ത വിധം ക്ലബ്ബിനോടും ഓഹരി ഉടമകളോടും അദ്ദേഹം അനാദരവ് കാട്ടി.”

അന്താരാഷ്ട്ര നിക്ഷേപക ഗ്രൂപ്പിന്റെ നേതൃത്വത്തിൽ നടന്ന ഈ ഇടപാടിൽ സെർജിയോ റാമോസ് ഒരു പ്രധാന ഗ്യാരന്ററായി പ്രവർത്തിക്കുമെന്നായിരുന്നു അറിയിച്ചിരുന്നത്. സെവിയയുടെ 85% ഓഹരികൾ വിൽക്കുന്നതും വലിയ തോതിലുള്ള മൂലധന നിക്ഷേപവും ഇതിൽ ഉൾപ്പെട്ടിരുന്നു. എന്നാൽ, കരാർ ഒപ്പിടുന്നതിന് തൊട്ടുമുമ്പ് നിക്ഷേപക ഗ്രൂപ്പിന്റെ ഘടനയിൽ മാറ്റം വരുത്തിയത് ചർച്ചകളെ പ്രതികൂലമായി ബാധിച്ചു.

കൂടാതെ, കരാർ പ്രകാരമുള്ള രഹസ്യ സ്വഭാവം സൂക്ഷിക്കേണ്ട സാമ്പത്തിക വിവരങ്ങൾ പുറത്തുവിട്ടതിലൂടെ ഒപ്പിട്ട കരാറുകൾ റാമോസ് ലംഘിച്ചതായും ഓഹരി ഉടമകൾ ആരോപിക്കുന്നു.

“സെവിയ എഫ്‌സിയിലെ മുൻ കളിക്കാരനായ റാമോസിന്റെ സാന്നിധ്യം ഇടപാടിന്റെ വിജയത്തിനുള്ള വ്യക്തിപരമായ ഉറപ്പായാണ് ഞങ്ങൾ കണ്ടത്.”

ആദ്യഘട്ട ചർച്ചകളിൽ നിശ്ചയിച്ച നിക്ഷേപക ഗ്രൂപ്പിനെ മാറ്റി പുതിയവരെ ഉൾപ്പെടുത്തിയെന്ന് റാമോസും പ്രതിനിധികളും പിന്നീട് സമ്മതിച്ചു. ഇത് നിലവിലുള്ള കരാറിന്റെ സാധുത നഷ്ടപ്പെടുത്തിയെന്ന് ഉടമകൾ പറയുന്നു.

റമോസുമായുള്ള ചർച്ചകൾ പരാജയപ്പെട്ട സാഹചര്യത്തിൽ, മറ്റ് നിക്ഷേപകരുമായി ചർച്ചകൾ പുനരാരംഭിക്കാൻ ക്ലബ്ബ് അധികൃതർ തീരുമാനിച്ചു. കരാർ ലംഘനങ്ങൾക്കും രഹസ്യ സ്വഭാവം സൂക്ഷിക്കുന്നതിൽ വീഴ്ച വരുത്തിയതിനും റാമോസിനെതിരെ നിയമനടപടികൾ സ്വീകരിക്കുന്നത് പരിഗണനയിലാണെന്നും ക്ലബ്ബ് വ്യക്തമാക്കി.