ആഴ്സണലിലെ തന്റെ കരിയറിനെയും വളർച്ചയെയും കുറിച്ച് വില്യം സാലിബ മനസ്സ് തുറന്നു. ഒരു സെന്റർ ബാക്ക് എന്ന നിലയിൽ കരിയർ കെട്ടിപ്പടുക്കാൻ സാധിച്ചതിൽ താൻ സന്തുഷ്ടനാണെന്ന് താരം പറഞ്ഞു.

“ദൈവം തീരുമാനിച്ചത് ഞാൻ ഒരു സെന്റർ ബാക്ക് ആകണമെന്നാണ്, അതിൽ എനിക്ക് വലിയ സന്തോഷമുണ്ട്. ഒരു പ്രൊഫഷണൽ ഫുട്ബോൾ താരമാകാൻ ഒരു ഗോൾകീപ്പർ ആകേണ്ടി വന്നിരുന്നെങ്കിൽ പോലും ഞാൻ അതിന് തയ്യാറായേനെ,” സാലിബ വ്യക്തമാക്കി.

“ചെറുപ്പത്തിൽ എല്ലാവരെയും പോലെ ഞാനും ഗോളുകൾ അടിക്കുന്നതും അസിസ്റ്റുകൾ നൽകുന്നതുമായ മുന്നേറ്റനിര താരങ്ങളെയാണ് കൂടുതൽ ശ്രദ്ധിച്ചിരുന്നത്. അത്തരമൊരു പ്രകടനം കാണുന്നതാണ് എല്ലാവർക്കും ഇഷ്ടം.”

“എനിക്ക് സാധിച്ചിരുന്നെങ്കിൽ ഒരു നമ്പർ 9 ആയി കളിക്കാനും സീസണിൽ 30 ഗോളുകൾ നേടാനും ഞാൻ ആഗ്രഹിച്ചിരുന്നു. എംബാപ്പെയെപ്പോലെയോ ഡെംബലെയെപ്പോലെയോ ഉള്ള ഒരു സൂപ്പർ സ്റ്റാർ ആകാൻ എനിക്ക് കഴിയില്ലായിരിക്കാം, പക്ഷേ എന്റെ പൊസിഷനിൽ ഞാൻ മികച്ചവരിൽ ഒരാളാണ്,” എന്നും സാലിബ കൂട്ടിച്ചേർത്തു.