എർലിംഗ് ഹാലണ്ട് ഭാവിയിൽ ബാലൺ ഡി ഓർ പുരസ്കാരം നേടുമെന്ന് മാഞ്ചസ്റ്റർ സിറ്റി ചെയർമാൻ ഖൽദൂൺ അൽ മുബാറക് അഭിപ്രായപ്പെട്ടു. ക്ലബ്ബിലെത്തിയതിന് ശേഷം ഹാലണ്ട് പ്രകടിപ്പിക്കുന്ന മികച്ച നേതൃപാടവത്തെയും സ്വാധീനത്തെയും അദ്ദേഹം പ്രശംസിച്ചു.

“എർലിംഗിനെ സംബന്ധിച്ചിടത്തോളം, അവൻ ക്ലബ്ബിൽ കാലെടുത്തുവെച്ച ആദ്യ ദിവസം മുതൽ ഒരു നേതാവായിരുന്നു. മികച്ച വ്യക്തിത്വവും ആകർഷകമായ ശൈലിയുമായാണ് അവൻ ടീമിലെത്തിയത്. നിങ്ങൾ ഒരു സൂപ്പർ സ്റ്റാറും ഗോൾ മെഷീനുമാകുമ്പോൾ സ്വാഭാവികമായും നിങ്ങൾ ഒരു നേതാവായി മാറുന്നു. അവന് അത്തരമൊരു വ്യക്തിത്വമുണ്ട്,” അൽ മുബാറക് പറഞ്ഞു.

“ഭാഗ്യവശാൽ, അവൻ ടീമിലെത്തിയപ്പോൾ അവിടെ ഇൽക്കായ് ഗുണ്ടോഗൻ, ബെർണാഡോ സിൽവ, റോഡ്രി, റൂബൻ ഡിയാസ് തുടങ്ങി നിരവധി മികച്ച നേതാക്കൾ ഉണ്ടായിരുന്നു. മികച്ച സ്വഭാവഗുണമുള്ളവരും ഉയർന്ന ഫുട്ബോൾ ബുദ്ധിയുള്ളവരുമായ കളിക്കാർക്കൊപ്പം പ്രവർത്തിക്കാൻ അവന് സാധിച്ചു.”

“കഴിഞ്ഞ രണ്ട് സീസണുകളിലായി ഹാലണ്ട് ടീമിൽ കൂടുതൽ ഉത്തരവാദിത്തമുള്ള റോളിലേക്ക് ഉയരുന്നത് നമുക്ക് കാണാം. അവനാണ് ലോകത്തിലെ ഏറ്റവും മികച്ച സ്ട്രൈക്കർ എന്ന് ഞാൻ കരുതുന്നു. ഭാവിയിൽ ബാലൺ ഡി ഓർ പുരസ്കാരം അവൻ സ്വന്തമാക്കുമെന്ന് ഞാൻ വിശ്വസിക്കുന്നു. മാഞ്ചസ്റ്റർ സിറ്റിയുടെ വിജയമന്ത്രമായ ആ വിജയിക്കാനുള്ള മനോഭാവം അവനുണ്ട്. ഈ യുവാവ് ഒരു വിന്നറാണ്,” അൽ മുബാറക് കൂട്ടിച്ചേർത്തു.