ലോകകപ്പിന് തയ്യാറെടുക്കുന്ന ജർമ്മൻ ഫുട്ബോൾ ടീമിന് തിരിച്ചടിയായി ബയേൺ മ്യൂണിക്ക് താരം ലെനാർട്ട് കാളിന് പരിക്ക്. വെള്ളിയാഴ്ച നടന്ന പരിശീലനത്തിനിടെയാണ് പതിനെട്ടുകാരനായ താരത്തിന് പരിക്കേറ്റത്.

പരിക്കിന്റെ വ്യാപ്തി വ്യക്തമല്ലാത്തതിനാൽ താരത്തെ തുടർപരിശോധനകൾക്കായി ആശുപത്രിയിലേക്ക് മാറ്റിയതായി മുഖ്യ പരിശീലകൻ ജൂലിയൻ നാഗൽസ്മാൻ സ്ഥിരീകരിച്ചു.

“സാഹചര്യം അത്ര നല്ലതല്ല. താരത്തെ ആശുപത്രിയിൽ പ്രവേശിപ്പിച്ചിരിക്കുകയാണ്, സ്കാനിംഗ് നടത്തും. പരിശോധനാ ഫലം വന്നതിന് ശേഷമേ താരം ലോകകപ്പിൽ കളിക്കുമോ അതോ പകരക്കാരനെ കണ്ടെത്തേണ്ടി വരുമോ എന്ന് തീരുമാനിക്കാൻ കഴിയൂ,” നാഗൽസ്മാൻ മാധ്യമങ്ങളോട് പറഞ്ഞു.

ജർമ്മനിയുടെ ലോകകപ്പ് സംഘത്തിൽ ഇടംപിടിച്ച് തന്റെ മികച്ച സീസൺ പൂർത്തിയാക്കാൻ കാത്തിരുന്ന താരത്തിന് ഈ പരിക്ക് വലിയൊരു വെല്ലുവിളിയാണ് ഉയർത്തുന്നത്.

ബയേൺ മ്യൂണിക്കിനായി അരങ്ങേറ്റം കുറിച്ച ഈ സീസണിൽ 39 മത്സരങ്ങളിൽ നിന്ന് ഒമ്പത് ഗോളുകളും ഏഴ് അസിസ്റ്റുകളും താരം സ്വന്തമാക്കിയിരുന്നു.

ജർമ്മൻ ഫുട്ബോളിലെ ഏറ്റവും മികച്ച യുവപ്രതിഭകളിലൊരാളായി മാറിയ കാളിനെ നാഗൽസ്മാൻ തന്റെ ലോകകപ്പ് പ്ലാനുകളിൽ പ്രധാനപ്പെട്ട താരമായാണ് കണക്കാക്കിയിരുന്നത്.

ജൂൺ ആറിന് ചിക്കാഗോയിലെ സോൾജിയർ ഫീൽഡിൽ അമേരിക്കയ്ക്കെതിരെ നടക്കുന്ന ലോകകപ്പ് സന്നാഹ മത്സരത്തിനുള്ള തയ്യാറെടുപ്പിലാണ് ജർമ്മനി. സ്കാനിംഗ് ഫലത്തിനായി കാത്തിരിക്കുകയാണ് ടീം ഇപ്പോൾ.

നാല് തവണ ലോക ചാമ്പ്യന്മാരായ ജർമ്മനി ഗ്രൂപ്പ് ഇ-യിലാണ് മത്സരിക്കുന്നത്. ജൂൺ 14-ന് ഹ്യൂസ്റ്റണിൽ കുറാസാവുവിനെതിരെയാണ് അവരുടെ ആദ്യ മത്സരം. തുടർന്ന് ജൂൺ 20-ന് ടൊറന്റോയിൽ ഐവറി കോസ്റ്റിനെയും ജൂൺ 25-ന് ഇക്വഡോറിനെയും ജർമ്മനി നേരിടും.