2026 ഫിഫ ലോകകപ്പിനായുള്ള തയ്യാറെടുപ്പുകൾ പോർച്ചുഗൽ വിജയത്തോടെ തുടങ്ങി. ലിസ്ബണിൽ നടന്ന സൗഹൃദ മത്സരത്തിൽ ചിലിക്കെതിരെ ഒന്നിനെതിരെ രണ്ട് ഗോളുകൾക്കായിരുന്നു പോർച്ചുഗലിന്റെ വിജയം. ഈ വിജയത്തോടെ സ്വന്തം തട്ടകത്തിലെ തങ്ങളുടെ അപരാജിത കുതിപ്പ് പോർച്ചുഗൽ തുടരുകയും ചെയ്തു.

റോബർട്ടോ മാർട്ടിനസിന്റെ കീഴിലുള്ള പോർച്ചുഗൽ ടീം മത്സരത്തിൽ ഉടനീളം ആധിപത്യം പുലർത്തി. രണ്ടാം പകുതിയിൽ ഗോൺസാലോ ഗുഡെസ്, ബ്രൂണോ ഫെർണാണ്ടസ് എന്നിവർ നേടിയ ഗോളുകളാണ് പോർച്ചുഗലിന് വിജയം സമ്മാനിച്ചത്.

ആദ്യ പകുതിയിൽ പോർച്ചുഗൽ നിരവധി അവസരങ്ങൾ സൃഷ്ടിച്ചെങ്കിലും ചിലി ഗോൾകീപ്പർ ലോറൻസ് വിഗൂറോയുടെ മികച്ച സേവുകൾ അവർക്ക് തടസ്സമായി. ഇതിനിടെ ക്രിസ്റ്റ്യാനോ റൊണാൾഡോ നേടിയ ഒരു ഗോൾ ഓഫ്സൈഡ് ആയതിനെത്തുടർന്ന് റഫറി അനുവദിച്ചില്ല.

ആദ്യ പകുതി അവസാനിക്കുന്നതിന് തൊട്ടുമുമ്പ് ഗ്രൗണ്ടിലുണ്ടായ സംഘർഷത്തെ തുടർന്ന് റാഫേൽ ലിയാവോ, ഇവാൻ റോമൻ എന്നിവർക്ക് നേരിട്ട് ചുവപ്പ് കാർഡ് ലഭിച്ചു. ഇതോടെ ഇരു ടീമുകളും 10 പേരായി ചുരുങ്ങി.

രണ്ടാം പകുതി തുടങ്ങിയ ഉടൻ തന്നെ റൂബൻ നെവസിന്റെ പാസിൽ നിന്ന് ഗോൺസാലോ ഗുഡെസ് പോർച്ചുഗലിനായി ഗോൾ നേടി. പിന്നാലെ ബ്രൂണോ ഫെർണാണ്ടസ് തന്റെ 29-ാമത് അന്താരാഷ്ട്ര ഗോൾ കൂടി നേടിയതോടെ പോർച്ചുഗൽ ലീഡ് വർദ്ധിപ്പിച്ചു. മത്സരത്തിന്റെ സ്റ്റോപ്പേജ് ടൈമിൽ ലൂക്കാസ് സെപെഡ ചിലിക്കായി ഒരു ഗോൾ മടക്കി.

ഈ വിജയത്തോടെ സ്വന്തം തട്ടകത്തിൽ തുടർച്ചയായി എട്ട് മത്സരങ്ങളിൽ പരാജയമറിയാതെ മുന്നേറാൻ പോർച്ചുഗലിന് സാധിച്ചു. നൈജീരിയക്കെതിരായ അടുത്ത സൗഹൃദ മത്സരത്തിനും, ലോകകപ്പിലെ ആദ്യ മത്സരമായ ഡിആർ കോംഗോയ്‌ക്കെതിരായ പോരാട്ടത്തിനും മുൻപുള്ള മികച്ച മുന്നൊരുക്കമായി ഈ ജയം മാറി.