2026 ലോകകപ്പ്: കളിക്കളത്തിൽ നിന്ന് വിട്ടുനിൽക്കുന്ന പ്രമുഖ ഫുട്ബോൾ താരങ്ങൾ ഇവരാണ്
ലോകകപ്പ് ഫുട്ബോൾ എന്നാൽ ഫുട്ബോൾ ഇതിഹാസങ്ങളും ലോകോത്തര താരങ്ങളും അണിനിരക്കുന്ന ഒരു വലിയ ആഘോഷമാണ്. എന്നാൽ, പല കാരണങ്ങളാൽ പല പ്രമുഖ താരങ്ങൾക്കും ഈ മഹാമേളയിൽ പങ്കെടുക്കാൻ കഴിയാറില്ല. വരാനിരിക്കുന്ന 2026 ലോകകപ്പും ഇതിന് അപവാദമല്ല. പല മികച്ച താരങ്ങളും ഇത്തവണത്തെ ലോകകപ്പ് മത്സരങ്ങൾ ടെലിവിഷനിലൂടെ നോക്കി കാണേണ്ടി വരും. അവരിൽ പ്രധാനപ്പെട്ട ചിലരെ നമുക്ക് പരിചയപ്പെടാം.
സമീപകാലത്തെ ആഫ്രിക്കയിലെ ഏറ്റവും മികച്ച താരങ്ങളിലൊരാളായ വിക്ടർ ഒസിമെൻ 2026 ലോകകപ്പിൽ ഉണ്ടാകില്ല. നൈജീരിയൻ ടീമിനായി നിരന്തരം ഗോളുകൾ നേടുന്ന താരമാണ് ഒസിമെൻ. തന്റെ രാജ്യത്തിനായി കളിച്ച 46 മത്സരങ്ങളിൽ നിന്ന് 31 ഗോളുകൾ അദ്ദേഹം സ്വന്തമാക്കിയിട്ടുണ്ട്. ഇതിൽ എട്ടെണ്ണം ലോകകപ്പ് യോഗ്യതാ മത്സരങ്ങളിലായിരുന്നു. എന്നാൽ, നൈജീരിയക്ക് യോഗ്യത നേടാൻ സാധിച്ചില്ല. തുടർച്ചയായ രണ്ടാം തവണയാണ് അവർ ലോകകപ്പിൽ നിന്ന് പുറത്താകുന്നത്. ഇതോടെ ഒസിമെന്റെ ലോകകപ്പ് അരങ്ങേറ്റം എന്ന സ്വപ്നം അനിശ്ചിതത്വത്തിലായി.
കഴിഞ്ഞ സീസണിലെ ലിവർപൂളിന്റെ മികച്ച താരങ്ങളിലൊരാളായ ഹംഗറി നായകൻ ലോകകപ്പിനില്ല. റിപ്പബ്ലിക് ഓഫ് അയർലൻഡിനെതിരായ മത്സരത്തിൽ ഇഞ്ചുറി ടൈമിൽ വഴങ്ങിയ ഗോൾ ഹംഗറിയുടെ യോഗ്യതാ സാധ്യതകളെ ഇല്ലാതാക്കി. തുടർച്ചയായ പത്താം തവണയാണ് ഹംഗറി ലോകകപ്പിന് യോഗ്യത നേടാതെ പുറത്താകുന്നത്.
യൂറോ 2024-ൽ മികച്ച പ്രകടനം കാഴ്ചവെച്ച ജോർജിയൻ ടീമിന് ഇത്തവണ ലോകകപ്പിലേക്ക് യോഗ്യത നേടാനായില്ല. സ്പെയിനും തുർക്കിയും അടങ്ങുന്ന ഗ്രൂപ്പിൽ മൂന്നാം സ്ഥാനത്ത് ഫിനിഷ് ചെയ്യാനേ ഖ്വിചയും കൂട്ടർക്കും കഴിഞ്ഞുള്ളൂ.
അത്ലറ്റിക്കോ മാഡ്രിഡിന്റെ പ്രശസ്ത ഗോൾകീപ്പർ ഒബ്ലാക്ക് നയിക്കുന്ന സ്ലൊവേനിയൻ ടീമിനും ഇത്തവണ ലോകകപ്പിലേക്ക് യോഗ്യത നേടാനായില്ല. സ്വിറ്റ്സർലൻഡും കൊസോവോയും ഗ്രൂപ്പിൽ മുന്നിലെത്തിയപ്പോൾ ഒബ്ലാക്കും സംഘവും വെറുംകൈയോടെ മടങ്ങി.
പോളണ്ട് ദേശീയ ടീമിന്റെ ചരിത്രത്തിലെ ടോപ് സ്കോററായ റോബർട്ട് ലെവൻഡോവ്സ്കിക്ക് ലോകകപ്പ് സ്വപ്നം സഫലമാക്കാൻ കഴിഞ്ഞില്ല. പ്ലേ ഓഫ് ഫൈനലിൽ സ്വീഡനോട് പരാജയപ്പെട്ടതോടെ പോളണ്ടിന്റെ ലോകകപ്പ് മോഹം പൊലിഞ്ഞു. തുടക്കത്തിൽ അന്താരാഷ്ട്ര ഫുട്ബോളിൽ നിന്ന് വിരമിക്കൽ പ്രഖ്യാപിച്ചെങ്കിലും പിന്നീട് താരം അത് പിൻവലിച്ചിരുന്നു.
ഇറ്റാലിയൻ ടീമിലെ ഡൊണ്ണാരുമ്മ, സാൻഡ്രോ ടോണാലി, അലസ്സാൻഡ്രോ ബാസ്റ്റോണി തുടങ്ങി ഒട്ടേറെ താരങ്ങൾ ഇത്തവണ ലോകകപ്പിലുണ്ടാകില്ല. ലോക ഫുട്ബോളിലെ വമ്പൻമാരായ ഇറ്റലി തുടർച്ചയായി മൂന്നാം തവണയാണ് ലോകകപ്പ് യോഗ്യത നേടാതെ പുറത്താകുന്നത്.
ബ്രസീലിയൻ താരം ജോവാവോ പെഡ്രോയും ലോകകപ്പ് ടീമിൽ ഇടംനേടിയില്ല. പരിക്കേറ്റ നെയ്മറിന് അവസരം നൽകുന്നതിനായി പരിശീലകൻ കാർലോ ആൻസലോട്ടി ജോവാവോയെ അവസാന നിമിഷം ഒഴിവാക്കുകയായിരുന്നു.
ഇംഗ്ലണ്ട് ടീമിൽ നിന്നും ട്രെന്റ് അലക്സാണ്ടർ-അർനോൾഡിനെ ഒഴിവാക്കിയത് വലിയ ചർച്ചകൾക്ക് വഴിവെച്ചിരുന്നു. പരിശീലകൻ തോമസ് ടുക്കലിന്റെ ഈ തീരുമാനം ഏറെ വിമർശനങ്ങൾക്കിടയാക്കി.
സ്പാനിഷ് ടീമിൽ നിന്ന് റയൽ മാഡ്രിഡ് താരങ്ങളെ പൂർണമായും ഒഴിവാക്കിയത് ചരിത്രപരമായ ഒരു സംഭവമായി മാറി. പരിക്കുകാരണം ഡാനി കർവഹാലിനും ടീമിൽ ഇടം നേടാനായില്ല.
ജർമ്മൻ ഗോൾകീപ്പർ മാർക്ക്-ആന്ദ്രേ ടെർ സ്റ്റീഗനും പരിക്കുകാരണം ലോകകപ്പിൽ നിന്നും പുറത്തായി. ഇതോടെ മാനുവൽ നോയർ വീണ്ടും ജർമ്മൻ ടീമിൽ തന്റെ സ്ഥാനം ഉറപ്പിച്ചു.