പ്രതിരോധ താരം ജോസ്കോ ഗ്വാർഡിയോളുമായുള്ള പുതിയ കരാറിനായുള്ള ചർച്ചകളിൽ മാഞ്ചസ്റ്റർ സിറ്റി ശുഭാപ്തിവിശ്വാസം പുലർത്തുന്നതായി ബിബിസി റിപ്പോർട്ട് ചെയ്യുന്നു.

ഇപ്പോൾ 24 വയസ്സുള്ള താരത്തിന്റെ നിലവിലെ കരാർ 2028 വരെയാണ്. എങ്കിലും, താരത്തെ എത്തിഹാദ് സ്റ്റേഡിയത്തിൽ ദീർഘകാലത്തേക്ക് നിലനിർത്താനാണ് മാഞ്ചസ്റ്റർ സിറ്റി ലക്ഷ്യമിടുന്നത്.

ഈ ക്രൊയേഷ്യൻ താരം ബുണ്ടസ്‌ലിഗ ചാമ്പ്യന്മാരായ ബയേൺ മ്യൂണിക്കിലേക്ക് ചേക്കേറിയേക്കുമെന്ന് നേരത്തെ വാർത്തകൾ ഉണ്ടായിരുന്നു. എന്നാൽ, ഗ്വാർഡിയോൾ ക്ലബ്ബിൽ തുടരുമെന്നും കരാർ പുതുക്കുന്നതിനെ കുറിച്ചുള്ള ചർച്ചകൾ അനുകൂലമായി പുരോഗമിക്കുകയാണെന്നും മാഞ്ചസ്റ്റർ സിറ്റി മാനേജ്മെന്റ് കരുതുന്നു.

ജനുവരിയിൽ കാലിന് പരിക്കേറ്റതിനെ തുടർന്ന് നാല് മാസത്തോളം താരത്തിന് കളിക്കളം വിട്ടുനിൽക്കേണ്ടി വന്നിരുന്നു. അതിനാൽ കഴിഞ്ഞ സീസണിൽ എല്ലാ മത്സരങ്ങളിലുമായി 25 തവണ മാത്രമാണ് അദ്ദേഹം സിറ്റിക്കായി ബൂട്ടണിഞ്ഞത്.