ഫിഫ ലോകകപ്പ് 2026: അസ്‌ടെക്കയിൽ ഷാക്കിറയുടെ ഉദ്ഘാടന ചടങ്ങ്; മെക്സിക്കോ – ദക്ഷിണാഫ്രിക്ക മത്സരം ഇന്ന്; പ്രതിഷേധങ്ങളും ശക്തം

ഫിഫ ലോകകപ്പ് 2026 ഉദ്ഘാടന ചടങ്ങ് തത്സമയം: മെക്സിക്കോയിലെ ഉദ്ഘാടന ചടങ്ങിൽ ഷാക്കിറ ലോകകപ്പ് ഗാനം ആലപിക്കും. നൈജീരിയൻ ഗായകൻ ബർണ ബോയിയും പരിപാടിയിൽ പങ്കെടുക്കുന്നുണ്ട്. ദക്ഷിണാഫ്രിക്കൻ ഗായകൻ ടൈല, കൊളംബിയൻ ഗായകൻ ജെ ബാൽവിൻ എന്നിവരും വേദിയിലെത്തും. മെക്സിക്കൻ ഗായകരായ അലെജാൻഡ്രോ ഫെർണാണ്ടസ്, ലീല ഡൗൺസ്, ബെലിൻഡ, ഡാനി ഓഷ്യൻ എന്നിവരും കലാപരിപാടികൾ അവതരിപ്പിക്കും.

ഫിഫ ലോകകപ്പ് 2026 ഉദ്ഘാടന ചടങ്ങ് തത്സമയം: മെക്സിക്കോയിൽ കുറച്ചു ദിവസങ്ങളായി പ്രതിഷേധങ്ങൾ നടക്കുന്നുണ്ട്. ആരാധകർ ഒത്തുകൂടുന്ന മെക്സിക്കോ സിറ്റിയിലെ പ്ലാസയിലേക്കുള്ള പ്രവേശനം പ്രതിഷേധക്കാർ നേരത്തെ തടഞ്ഞിരുന്നു. ടൂർണമെന്റിനായുള്ള സർക്കാർ ചെലവുകളും രാഷ്ട്രീയ വിവാദങ്ങളും കാരണം പ്രസിഡന്റ് ക്ലോഡിയ ഷെയിൻബോം കടുത്ത വിമർശനം നേരിടുകയാണ്. കഴിഞ്ഞ ഒരാഴ്ചയായി രാജ്യത്തെ അധ്യാപക യൂണിയൻ ലോകകപ്പ് പ്രതിമകൾ നശിപ്പിക്കുകയും ചെയ്തിട്ടുണ്ട്. കാണാതായവർ ഉൾപ്പെടെയുള്ള രാജ്യത്തെ മറ്റ് പ്രധാന വിഷയങ്ങളിൽ സർക്കാർ ശ്രദ്ധ കേന്ദ്രീകരിക്കണമെന്നാണ് പ്രതിഷേധക്കാരുടെ ആവശ്യം.

ഫിഫ ലോകകപ്പ് 2026 ഉദ്ഘാടന ചടങ്ങ് തത്സമയം: മെക്സിക്കോ തലസ്ഥാനത്ത് പ്രതിഷേധങ്ങൾ നടക്കുന്നുണ്ടെങ്കിലും, ഉദ്ഘാടന ചടങ്ങും മത്സരവും സോകാലോ സ്ക്വയറിൽ സംപ്രേഷണം ചെയ്യുമെന്ന് പ്രസിഡന്റ് ക്ലോഡിയ ഷെയിൻബോം വ്യക്തമാക്കി.

ഫിഫ ലോകകപ്പ് 2026 ഉദ്ഘാടന ചടങ്ങ് തത്സമയം: ലോകത്തെ ഏറ്റവും വലിയ കായിക മാമാങ്കത്തിന് തുടക്കമായി. നാല് വർഷങ്ങൾക്ക് മുൻപ് ലയണൽ മെസ്സിയുടെ നേതൃത്വത്തിൽ അർജന്റീന ലോകകപ്പ് നേടിയതിന് ശേഷം വീണ്ടുമൊരു ലോകകപ്പ് കാലം. അമേരിക്ക, മെക്സിക്കോ, കാനഡ എന്നിവരാണ് ആതിഥേയർ. ഉദ്ഘാടന മത്സരത്തിൽ മെക്സിക്കോ ദക്ഷിണാഫ്രിക്കയെ നേരിടും. മത്സരത്തിന് മുൻപായി നടക്കുന്ന ഉദ്ഘാടന ചടങ്ങിൽ ഷാക്കിറ പ്രധാന ആകർഷണമായിരിക്കും.