അർജന്റീനയുടെ മുന്നേറ്റനിര താരം മത്തിയാസ് സൗലെയെ ഈ വേനൽക്കാല ട്രാൻസ്ഫർ വിൻഡോയിൽ വിൽക്കാൻ എഎസ് റോമ തയ്യാറെടുക്കുന്നതായി ഗസെറ്റ ഡെല്ലോ സ്പോർട്ട് റിപ്പോർട്ട് ചെയ്യുന്നു.

ജൂൺ 30-നകം യുവേഫയുടെ ഫിനാൻഷ്യൽ ഫെയർ പ്ലേ കരാർ വ്യവസ്ഥകൾ പാലിക്കുന്നതിന്റെ ഭാഗമായാണ് താരത്തെ വിൽക്കാൻ ക്ലബ്ബ് മാനേജ്മെന്റ് തീരുമാനിച്ചത്.

സൗലെയുടെ ഏജന്റായ മാർട്ടിൻ ഗ്വാസ്റ്റാഡിസെഗ്നോ വ്യാഴാഴ്ച രാവിലെ ട്രിഗോറിയയിലെത്തി ക്ലബ്ബ് അധികൃതരുമായി ചർച്ച നടത്തി. ജർമ്മൻ ക്ലബ്ബായ ബൊറൂസിയ ഡോർട്ട്മുണ്ഡാണ് താരത്തെ സ്വന്തമാക്കാനുള്ള മത്സരത്തിൽ നിലവിൽ മുന്നിലുള്ളത്.

മുൻ യുവന്റസ് താരമായ സൗലെയ്ക്കായി 35 മുതൽ 40 ദശലക്ഷം യൂറോ വരെയാണ് റോമ പ്രതീക്ഷിക്കുന്നത്. ഈ തുക ലഭിച്ചാൽ ക്ലബ്ബിന് 20 ദശലക്ഷം യൂറോയുടെ ലാഭം ലഭിക്കും.

സൗലെയെ വിറ്റ് ലഭിക്കുന്ന ഈ തുക പരിശീലകൻ ജിയാൻ പിയറോ ഗാസ്പെരിനിയുടെ പ്രധാന ലക്ഷ്യമായ ഇംഗ്ലീഷ് ഫോർവേഡ് മേസൺ ഗ്രീൻവുഡിനെ ടീമിലെത്തിക്കാൻ ഉപയോഗിക്കാനാണ് റോമയുടെ പദ്ധതി.

മാർസെയിൽ നിലവിൽ 50 ദശലക്ഷം യൂറോയാണ് ആവശ്യപ്പെടുന്നതെങ്കിലും, 45 ദശലക്ഷം യൂറോയ്ക്ക് ഇടപാട് പൂർത്തിയാക്കാൻ കഴിയുമെന്ന് റോമ വിശ്വസിക്കുന്നു.