ലോകകപ്പ് ഫുട്ബോൾ കിരീടം ലക്ഷ്യമിട്ടിറങ്ങുന്ന പോർച്ചുഗൽ ടീമിന് വലിയ സമ്മർദ്ദമില്ലെന്നും ഓരോ മത്സരത്തിലും ശ്രദ്ധ കേന്ദ്രീകരിച്ച് മുന്നോട്ട് പോകാനാണ് തീരുമാനമെന്നും മിഡ്ഫീൽഡർ വിറ്റിന്യ വ്യക്തമാക്കി. അമേരിക്കയിൽ നടക്കുന്ന 48 ടീമുകൾ മാറ്റുരയ്ക്കുന്ന ഈ ലോകകപ്പിലെ ശക്തരായ ടീമുകളിലൊന്നാണ് ക്രിസ്റ്റ്യാനോ റൊണാൾഡോ നയിക്കുന്ന പോർച്ചുഗൽ. ഭാവിയെക്കുറിച്ച് ആശങ്കപ്പെടാതെ വർത്തമാനകാലത്ത് ശ്രദ്ധയൂന്നാനാണ് തങ്ങളുടെ തീരുമാനമെന്നും വിറ്റിന്യ പറഞ്ഞു. ജൂൺ 17-ന് ഹ്യൂസ്റ്റണിൽ കോംഗോയ്ക്കെതിരെയാണ് പോർച്ചുഗലിന്റെ ആദ്യ മത്സരം.
ടീമിലെ ഓരോ താരവും ഒരു പ്രത്യേക പ്രചോദനവുമായാണ് ഇത്തവണ കളത്തിലിറങ്ങുന്നത്. കഴിഞ്ഞ ജൂലൈയിൽ സ്പെയിനിൽ വാഹനാപകടത്തിൽ അന്തരിച്ച സഹതാരം ഡിയോഗോ ജോട്ടയുടെ പേരുള്ള ബ്രേസ്ലെറ്റ് ഓരോ താരവും അണിഞ്ഞിട്ടുണ്ട്. പ്രധാനമന്ത്രി സമ്മാനിച്ച ഈ ബ്രേസ്ലെറ്റ് ടീമിന് വലിയൊരു വൈകാരിക അടുപ്പമാണ് നൽകുന്നത്. പരിശീലകൻ റോബർട്ടോ മാർട്ടിനസ് ജോട്ടയെ ടീമിന്റെ ഓണററി അംഗമായി ഉൾപ്പെടുത്തിയിട്ടുമുണ്ട്.
അമേരിക്കയിലെ കഠിനമായ ചൂട് കളിക്കാരെ ബാധിക്കുമെന്ന ആശങ്ക നിലനിൽക്കുന്നുണ്ടെങ്കിലും അതിനെ നേരിടാൻ ടീം സജ്ജമാണ്. എല്ലാ ടീമുകൾക്കും ഈ കാലാവസ്ഥ ഒരുപോലെയാണെന്നും, അതുകൊണ്ട് തന്നെ തങ്ങൾക്ക് ഒഴികഴിവുകളില്ലെന്നും വിറ്റിന്യ കൂട്ടിച്ചേർത്തു. ഫ്ലോറിഡയിലെ പരിശീലന ക്യാമ്പിൽ മികച്ച രീതിയിലാണ് താരങ്ങൾ തയ്യാറെടുക്കുന്നത്. കഠിനമായ ചൂടിനെ നേരിടാൻ ഇടവേളകളിൽ വിശ്രമവും വെള്ളവും ഉറപ്പാക്കുന്നുണ്ടെന്നും മാനസികമായ ഉന്മേഷം നിലനിർത്താൻ ഇത്തരം തയ്യാറെടുപ്പുകൾ സഹായിക്കുന്നുണ്ടെന്നും അദ്ദേഹം പറഞ്ഞു.