സ്വന്തം മണ്ണിലെ ലോകകപ്പ് അമേരിക്ക സ്വന്തമാക്കുമെന്ന് ജോസി ആൾട്ടിഡോർ

അമേരിക്കയിൽ നടക്കുന്ന ഫിഫ ലോകകപ്പിൽ യുഎസ് ടീം കിരീടം നേടുമെന്ന് മുൻ യുഎസ് ദേശീയ ടീം താരം ജോസി ആൾട്ടിഡോർ പ്രത്യാശ പ്രകടിപ്പിച്ചു. സ്വന്തം മണ്ണിൽ നടക്കുന്ന ലോകകപ്പിൽ അമേരിക്ക വിജയിക്കുമെന്ന കാര്യത്തിൽ തനിക്ക് ഉറച്ച വിശ്വാസമുണ്ടെന്ന് അദ്ദേഹം പറഞ്ഞു.

“അമേരിക്ക ലോകകപ്പ് നേടും. ഇതിൽ വിശ്വാസമില്ലാത്തവർക്ക് മാറിനിൽക്കാം (ചിരിച്ചുകൊണ്ട്). ഞാൻ ഇങ്ങനെ പറയാൻ പല കാരണങ്ങളുണ്ട്. ടൂർണമെന്റ് വേദികളും നിലവിലെ ഫുട്ബോൾ സാഹചര്യങ്ങളും അതിന് അനുകൂലമാണ്,” ആൾട്ടിഡോർ വ്യക്തമാക്കി.

കഴിഞ്ഞ കുറേ കാലമായി ലയണൽ മെസ്സിയുടെയും ക്രിസ്റ്റ്യാനോ റൊണാൾഡോയുടെയും മികച്ച പ്രകടനങ്ങൾ കണ്ടാണ് ആരാധകർ വളർന്നത്. എന്നാൽ നിലവിലെ ഫുട്ബോൾ സാഹചര്യത്തിൽ അത്തരത്തിൽ ആധിപത്യം പുലർത്തുന്ന താരങ്ങൾ ആരും തന്നെയില്ലെന്ന് അദ്ദേഹം അഭിപ്രായപ്പെട്ടു.

“മെസ്സിയും റൊണാൾഡോയും തങ്ങളുടെ കരിയറിന്റെ അവസാന ഘട്ടത്തിലാണ്. മെസ്സി, ഹസാർഡ്, റൊണാൾഡോ തുടങ്ങിയ അസാധാരണരായ താരങ്ങളുടെ അഭാവം മത്സരത്തിൽ എല്ലാവർക്കും തുല്യ അവസരമൊരുക്കുന്നു. ഇത് കളിയുടെ ആവേശം വർദ്ധിപ്പിക്കും,” ആൾട്ടിഡോർ കൂട്ടിച്ചേർത്തു.