റിയൽ മാഡ്രിഡ് താരം വിനീഷ്യസ് ജൂനിയറിനെതിരെ വംശീയാധിക്ഷേപം നടത്തിയ സംഭവത്തിൽ അത്ലറ്റികോ മാഡ്രിഡ് ആരാധകനെ സ്പാനിഷ് നാഷണൽ പോലീസ് അറസ്റ്റ് ചെയ്തതായി ഡയറിയോ എഎസ് റിപ്പോർട്ട് ചെയ്യുന്നു.

ഏപ്രിൽ 14-ന് ബാഴ്‌സലോണയ്‌ക്കെതിരായ ചാമ്പ്യൻസ് ലീഗ് ക്വാർട്ടർ ഫൈനൽ മത്സരത്തിന് മുന്നോടിയായി റിയാദ് എയർ മെട്രോപൊളിറ്റാനോ സ്റ്റേഡിയത്തിന് പുറത്തുവെച്ചാണ് സംഭവം നടന്നത്.

അവിടെ ഉണ്ടായിരുന്ന റിയൽ മാഡ്രിഡ് താരത്തിനെതിരെ ആരാധകൻ അധിക്ഷേപകരമായ വാക്കുകൾ ഉപയോഗിക്കുന്നത് ബ്രസീലിയൻ ടെലിവിഷൻ ചാനലും വിവിധ സോഷ്യൽ മീഡിയ പ്ലാറ്റ്‌ഫോമുകളും പുറത്തുവിട്ട വീഡിയോ ദൃശ്യങ്ങളിൽ വ്യക്തമാണ്.

മാഡ്രിഡിലെയും വലൻസിയയിലെയും നാഷണൽ പോലീസ് ഇൻഫർമേഷൻ ബ്രിഗേഡുകൾ സംയുക്തമായി നടത്തിയ അന്വേഷണത്തിനൊടുവിലാണ് 27 വയസ്സുള്ള പ്രതിയെ പോലീസ് പിടികൂടിയത്.

ബ്രസീലിയൻ താരത്തിനെതിരെ തുടരുന്ന വംശീയ അധിക്ഷേപങ്ങളിൽ നടക്കുന്ന പ്രധാനപ്പെട്ട അറസ്റ്റുകളിൽ ഒന്നാണിത്. വിദ്വേഷം വളർത്തുന്ന തരത്തിൽ പ്രവർത്തിച്ചതിന് പിടിയിലായ വ്യക്തിക്കെതിരെ ഔദ്യോഗികമായി നിയമനടപടികൾ ആരംഭിച്ചു.