എന്തിനേക്കാളും ഉപരിയായി ടീമിനാണ് പ്രാധാന്യം നൽകേണ്ടതെന്ന് ക്രിസ്റ്റ്യാനോ റൊണാൾഡോയെ ഓർമ്മിപ്പിച്ച് ഫ്രഞ്ച് ഇതിഹാസ താരം തിയറി ഹെൻറി. ഡിആർ കോംഗോയ്‌ക്കെതിരായ മത്സരത്തിൽ പോർച്ചുഗൽ ക്യാപ്റ്റനായ റൊണാൾഡോ സ്വയം ഗോൾ അടിക്കാൻ ശ്രമിച്ചതിനെ വിമർശിച്ചുകൊണ്ടാണ് ഹെൻറിയുടെ പ്രതികരണം. ആ സന്ദർഭത്തിൽ പന്ത് ബ്രൂണോ ഫെർണാണ്ടസിന് നൽകുന്നതിന് പകരം റൊണാൾഡോ തന്നെ ഷോട്ട് ഉതിർക്കുകയും അത് ലക്ഷ്യത്തിലെത്താതെ പോകുകയുമായിരുന്നു.

“ഇതാണ് ഏറ്റവും പ്രധാനം. വീട്ടിലിരുന്ന് കളി കാണുന്നവർ മനസ്സിലാക്കുക, ടീമാണ് ഗോൾ നേടേണ്ടത്, അല്ലാതെ നിങ്ങൾ വ്യക്തിപരമായി ഗോൾ നേടുകയല്ല വേണ്ടത്. ഞാൻ അത് വിശദീകരിക്കാം,” ഹെൻറി പറഞ്ഞു.

“ക്രിസ്റ്റ്യാനോ ഇത്തരം സാഹചര്യങ്ങളിൽ പലതവണ പെട്ടിട്ടുണ്ട്. റൊണാൾഡോ ഗോളിലേക്ക് ഓടുകയാണെങ്കിൽ പ്രതിരോധ താരങ്ങൾക്ക് ആശയക്കുഴപ്പം നേരിടും. എന്നാൽ താൻ തന്നെ ഗോൾ അടിക്കണമെന്ന ആഗ്രഹം മൂലം, സിക്സ് യാർഡ് ബോക്സിലേക്ക് ഓടുന്നതിന് പകരം അദ്ദേഹം ബ്രൂണോ ഫെർണാണ്ടസിന്റെ മുന്നിൽ തടസ്സമായി നിൽക്കുന്നു. റൊണാൾഡോ ഓടിയിരുന്നെങ്കിൽ ഡിഫൻഡർ അദ്ദേഹത്തെ പിന്തുടരേണ്ടി വരുമായിരുന്നു, അപ്പോൾ ബ്രൂണോയ്ക്ക് പന്ത് അനായാസം വലയിലാക്കാമായിരുന്നു. എന്നാൽ സ്വന്തമായി ഗോൾ നേടാനുള്ള ശ്രമത്തിൽ റൊണാൾഡോ പന്തിന് മുന്നിൽ തടസ്സമാവുകയും, അത് പ്രതിരോധിക്കാൻ ഡിഫൻഡർക്ക് എളുപ്പമാവുകയും ചെയ്തു.”

“ഞാൻ പറയുന്നത് ഇതാണ്: ടീമാണ് സ്കോർ ചെയ്യേണ്ടത്, നിങ്ങൾ വ്യക്തിപരമായിട്ടല്ല. ബ്രൂണോയുടെ പ്രതികരണം നിങ്ങൾ കണ്ടതാണല്ലോ,” ഫോക്സ് സ്പോർട്സിനോട് സംസാരിക്കവെ ഹെൻറി വ്യക്തമാക്കി.