പോർച്ചുഗലിന്റെ പ്രകടനം തീർത്തും മോശമായിരുന്നുവെന്നും പല കാര്യങ്ങളും ടീമിന് അനുകൂലമായില്ലെന്നും പൗലോ ബർബോസ പറഞ്ഞു. ഈ രീതിയിലാണ് കളിയെങ്കിൽ ടീമിന് മുന്നോട്ട് പോകാൻ കഴിയില്ല. അടുത്ത മത്സരത്തിൽ പരിശീലകൻ തന്ത്രങ്ങളിലും കളിക്കാരിലും മാറ്റങ്ങൾ വരുത്തുന്നില്ലെങ്കിൽ ഗ്രൂപ്പിൽ നിന്ന് പുറത്തുപോകാതിരിക്കാൻ പോർച്ചുഗൽ ബുദ്ധിമുട്ടും. നടന്ന മത്സരം വിജയിക്കാൻ പോർച്ചുഗൽ അർഹരല്ലെന്നും സമനിലയാണ് ഏറ്റവും അനുയോജ്യമായ ഫലമെന്നും അദ്ദേഹം വ്യക്തമാക്കി.

റൊണാൾഡോയുടെ പ്രായം കണക്കിലെടുക്കുമ്പോൾ ഒരു മുഴുവൻ മത്സരവും കളിക്കുക എന്നത് അദ്ദേഹത്തിന് ബുദ്ധിമുട്ടാണ്. അതിനാൽ സ്റ്റാർട്ടിംഗ് ലൈനപ്പിൽ അദ്ദേഹത്തെ ഉൾപ്പെടുത്തിയത് തെറ്റായ തീരുമാനമാണെന്നാണ് തനിക്ക് തോന്നുന്നത്. നിലവിൽ മികച്ച ഫോമിലുള്ള മറ്റ് താരങ്ങൾ ടീമിലുണ്ട്.

ടീമിന് ഗുണകരമാകുന്ന തീരുമാനങ്ങൾ പരിശീലകൻ സ്വീകരിക്കുമെന്ന് തന്നെയാണ് കരുതുന്നത്. അടുത്ത മത്സരത്തിൽ റൊണാൾഡോയെ സ്റ്റാർട്ടിംഗ് ഇലവനിൽ ഇറക്കി പരിശീലകൻ റിസ്ക് എടുക്കാൻ സാധ്യതയില്ല. അദ്ദേഹം ബെഞ്ചിൽ തന്നെ ഇരിക്കാനാണ് സാധ്യതയെന്നും ബർബോസ പറഞ്ഞു.

റൊണാൾഡോയ്ക്ക് പകരം ഗോൺസാലോ റാമോസിനെയോ ജോവോ ഫെലിക്സിനെയോ കളിപ്പിക്കാം. ഇവർ ടീമിലിടം പിടിച്ചാൽ പോർച്ചുഗലിന്റെ കളിരീതിയിൽ വലിയ മാറ്റങ്ങൾ ഉണ്ടാകുമെന്നും പൗലോ ബർബോസ കൂട്ടിച്ചേർത്തു.