ഒസാസുനയുടെ സ്പാനിഷ് വിങ്ങർ വിക്ടർ മുനോസിനെ ലിവർപൂൾ ടീമിലെത്തിക്കുന്നു. 40 മില്യൺ യൂറോയുടെ റിലീസ് ക്ലോസ് ലിവർപൂൾ ഇതിനോടകം ആക്റ്റിവേറ്റ് ചെയ്തു.

22 വയസ്സുകാരനായ താരത്തിനായി ന്യൂകാസിൽ യുണൈറ്റഡ് ഉൾപ്പെടെയുള്ള പ്രീമിയർ ലീഗ് ക്ലബ്ബുകൾ രംഗത്തുണ്ടായിരുന്നെങ്കിലും, അവരെ മറികടന്നാണ് ലിവർപൂൾ മുനോസിനെ സ്വന്തമാക്കുന്നത്.

ദ അത്‌ലറ്റിക് റിപ്പോർട്ട് പ്രകാരം, സ്പോർട്ടിംഗ് ഡയറക്ടർ റിച്ചാർഡ് ഹ്യൂസ്, ഫെൻവേ സ്പോർട്സ് ഗ്രൂപ്പിന്റെ ഫുട്ബോൾ സിഇഒ മൈക്കൽ എഡ്വേർഡ്സ് എന്നിവർ ഈ കരാർ പൂർത്തിയാക്കുന്നതിൽ നിർണ്ണായക പങ്കുവഹിച്ചു. ട്രാൻസ്ഫർ തുക രണ്ട് ഗഡുക്കളായി നൽകാൻ ലിവർപൂൾ ധാരണയിലെത്തി.

ലോകകപ്പിനായി സ്പെയിൻ ടീമിനൊപ്പം വിദേശത്തായിരുന്ന മുനോസ്, സ്പാനിഷ് ഫുട്ബോൾ ഫെഡറേഷന്റെ (RFEF) അനുമതിയോടെ അമേരിക്കയിൽ വെച്ച് മെഡിക്കൽ പരിശോധന പൂർത്തിയാക്കി.

അറ്റ്ലാന്റയിലെ സ്പെയിൻ ക്യാമ്പിൽ ലിവർപൂൾ അധികൃതർ നേരിട്ടെത്തിയാണ് നടപടികൾ ഏകോപിപ്പിച്ചത്. ആറു വർഷത്തെ കരാറിലാകും മുനോസ് ആൻഫീൽഡിൽ ഒപ്പുവെക്കുക.

ഈ മാസം ആദ്യം ഹെഡ് കോച്ചായി ആൻഡോണി ഇറാവോള ചുമതലയേറ്റ ശേഷം ലിവർപൂൾ നടത്തുന്ന ആദ്യ സൈനിംഗാണിത്. താരത്തെ ടീമിലെത്തിക്കുന്നതിൽ പുതിയ പരിശീലകന്റെ താല്പര്യവും നിർണ്ണായകമായി.

രണ്ട് വിങ്ങുകളിലും മധ്യഭാഗത്തും കളിക്കാൻ കഴിവുള്ള മുനോസ്, ലിവർപൂളിന്റെ മുന്നേറ്റനിരയ്ക്ക് കൂടുതൽ കരുത്തും വഴക്കവും നൽകുമെന്ന് കരുതപ്പെടുന്നു.