ടോട്ടനം ഹോട്സ്പർ ഡിഫൻഡർ മിക്കി വാൻ ഡി വെന്നിനെ ഈ വേനൽക്കാല ട്രാൻസ്ഫർ വിൻഡോയിൽ ലിവർപൂൾ ടീമിലെത്തിക്കുമെന്ന അഭ്യൂഹങ്ങൾക്ക് വിരാമമിട്ട് പ്രമുഖ ട്രാൻസ്ഫർ വിദഗ്ധൻ ഫാബ്രിസിയോ റൊമാനോ.

തന്റെ യൂട്യൂബ് ചാനലിലൂടെയാണ് റൊമാനോ ഇക്കാര്യം വ്യക്തമാക്കിയത്. ഡച്ച് സെന്റർ ബാക്കായ വാൻ ഡി വെന്നിനെ വിട്ടുനൽകാൻ ടോട്ടനത്തിന് യാതൊരു ഉദ്ദേശവുമില്ലെന്നും, ക്ലബ്ബിന്റെ ദീർഘകാല പദ്ധതികളിൽ അദ്ദേഹത്തിന് നിർണ്ണായക സ്ഥാനമാണുള്ളതെന്നും അദ്ദേഹം പറഞ്ഞു.

ഡച്ച് മാധ്യമങ്ങളിൽ നിന്ന് വരുന്ന വാർത്തകൾക്കിടയിലും, വാൻ ഡി വെന്നിന്റെ കാര്യത്തിൽ നിലവിൽ ക്ലബ്ബിനുള്ളിൽ മാറ്റങ്ങളൊന്നും പ്രതീക്ഷിക്കുന്നില്ലെന്ന് റൊമാനോ വിശദീകരിച്ചു.

“ഡച്ച് മാധ്യമങ്ങളിൽ നിന്ന് നിരവധി ചോദ്യങ്ങൾ ഉയരുന്നുണ്ട്. എല്ലാവരുടെയും വിവരങ്ങളെയും വാർത്തകളെയും ഞാൻ പൂർണ്ണമായും ബഹുമാനിക്കുന്നു.

“മിക്കി വാൻ ഡി വെൻ ലിവർപൂളിലേക്ക് എന്ന വാർത്തയെക്കുറിച്ച് എനിക്ക് പറയാനുള്ളത് ഇതാണ്; ടോട്ടനം മാനേജ്‌മെന്റും റോബർട്ടോ ഡി സെർബിയും അദ്ദേഹത്തെ വളരെ പ്രധാനപ്പെട്ട കളിക്കാരനായാണ് കണക്കാക്കുന്നത്. പുതിയ കരാർ ഒപ്പിട്ട പെഡ്രോ പോറോയെപ്പോലെ തന്നെ അദ്ദേഹവും ക്ലബ്ബിന് അനിവാര്യനാണ്.

“അദ്ദേഹം ക്ലബ്ബിൽ അവിഭാജ്യ ഘടകമാണ്, വാൻ ഡി വെൻ തുടരണമെന്ന് തന്നെയാണ് മാനേജ്‌മെന്റിന്റെ ആഗ്രഹം. അതിനാൽ ഈ വേനൽക്കാല ട്രാൻസ്ഫർ വിൻഡോയിൽ അദ്ദേഹത്തെ സംബന്ധിച്ച മാറ്റങ്ങളൊന്നും ഉണ്ടാകില്ലെന്നാണ് പ്രതീക്ഷിക്കുന്നത്.

“എന്തെങ്കിലും മാറ്റമുണ്ടായാൽ ഞാൻ നിങ്ങളെ അറിയിക്കാം, പക്ഷേ ഇന്നത്തെ നിലപാട് വളരെ വ്യക്തമാണ് – മിക്കി വാൻ ഡി വെൻ ക്ലബ്ബ് വിടില്ല,” റൊമാനോ കൂട്ടിച്ചേർത്തു.