2026-ലെ ഫുട്ബോൾ ലോകകപ്പിനെതിരെ രൂക്ഷ വിമർശനവുമായി എഫ്‌സി ബയേൺ മ്യൂണിക്ക് ഓണററി പ്രസിഡന്റ് ഉലി ഹോണസ് രംഗത്തെത്തി.

അമേരിക്ക, കാനഡ, മെക്സിക്കോ എന്നിവിടങ്ങളിലായി നടക്കുന്ന ടൂർണമെന്റ് ആരംഭിക്കുന്നതിന് ഒരാഴ്ച മുമ്പ് ഫ്രാങ്ക്ഫർട്ടർ അൽജീമൈൻ സെയ്‌തുങ്ങിന് നൽകിയ അഭിമുഖത്തിലാണ് അദ്ദേഹം തന്റെ അഭിപ്രായം വ്യക്തമാക്കിയത്. “ഈ ലോകകപ്പ് ഫുട്ബോളിന് വലിയൊരു പരാജയമായിരിക്കുമെന്ന് ഞാൻ വിശ്വസിക്കുന്നു,” ഹോണസ് പറഞ്ഞു.

ടിക്കറ്റ് നിരക്കുകൾ അമിതമാണെന്നതാണ് ഹോണസ് ഉയർത്തുന്ന പ്രധാന വിമർശനം. “ഫൈനൽ മത്സരത്തിന്റെ ഇടത്തരം ടിക്കറ്റിന് പോലും രണ്ടായിരം ഡോളറാണ് വില. ഇതൊക്കെ എവിടെ ചെന്ന് അവസാനിക്കും? ഫുട്ബോളിലെ വാണിജ്യവൽക്കരണത്തെ ഞാൻ എപ്പോഴും പിന്തുണച്ചിട്ടുണ്ട്, എന്നാൽ ഇത്രയും തീവ്രമായ രീതിയിലല്ല. ടിക്കറ്റുകൾ വാങ്ങി ഞാൻ ഇതിനെ പിന്തുണയ്ക്കാൻ ഉദ്ദേശിക്കുന്നില്ല,” അദ്ദേഹം വ്യക്തമാക്കി.

തനിക്ക് ടിക്കറ്റുകൾ വാങ്ങാനുള്ള സാമ്പത്തിക ശേഷിയുണ്ടെങ്കിലും ഇത്തരം വാണിജ്യവൽക്കരണത്തെ പ്രോത്സാഹിപ്പിക്കാൻ താല്പര്യമില്ലെന്ന് അദ്ദേഹം പറഞ്ഞു. കൂടാതെ, ഈ ലോകകപ്പിനായി താൻ യാത്ര ചെയ്യുന്നില്ലെന്നും ഹോണസ് കൂട്ടിച്ചേർത്തു.

“ഈ ലോകകപ്പിനായി യാത്ര ചെയ്യാൻ എനിക്ക് ഒട്ടും താല്പര്യമില്ല. ഇനി പോകണമെന്ന് ആഗ്രഹിച്ചാൽ തന്നെ, താമസസൗകര്യങ്ങളെക്കുറിച്ച് അറിഞ്ഞപ്പോൾ ആ താല്പര്യം കൂടി നഷ്ടപ്പെട്ടു,” അദ്ദേഹം പറഞ്ഞു.