അർജന്റീനയുടെ യുവ മിഡ്‌ഫീൽഡർ നിക്കോ പാസിന്റെ ഭാവി സംബന്ധിച്ച അനിശ്ചിതത്വം തുടരുന്നതിനിടെ, താരത്തെ സ്വന്തമാക്കാൻ ഇന്റർ മിലാൻ രംഗത്ത്. റയൽ മാഡ്രിഡും കോമോയും തമ്മിലുള്ള ചർച്ചകൾ പുരോഗമിക്കവേ, സാഹചര്യങ്ങൾ സൂക്ഷ്മമായി നിരീക്ഷിക്കുകയാണ് ഇന്റർ മിലാൻ.

കൊറിയറെ ഡെല്ലോ സ്‌പോർട്ടിന്റെ റിപ്പോർട്ട് പ്രകാരം, റയൽ മാഡ്രിഡ്, കോമോ, ഇന്റർ മിലാൻ എന്നിവർ ഉൾപ്പെടുന്ന ഒരു ത്രികോണ മത്സരമാണ് നിലവിൽ നടക്കുന്നത്. ഈ സമ്മർ ട്രാൻസ്ഫർ വിൻഡോയിൽ ജൂൺ 30 വരെയാണ് താരത്തിന്റെ ബൈ-ബാക്ക് ക്ലോസ് സാധുവായിരിക്കുക.

ചർച്ചകളിൽ എന്തെങ്കിലും തടസ്സങ്ങൾ ഉണ്ടായാൽ ഉടൻ ഇടപെടാനാണ് നെരാസൂരികളുടെ തീരുമാനം. ഇതിന്റെ ഭാഗമായി തിരശ്ശീലയ്ക്ക് പിന്നിൽ അവർ പ്രാഥമിക ചർച്ചകൾ ആരംഭിച്ചു കഴിഞ്ഞു.

മാഡ്രിഡിൽ നടന്ന അടുത്തിടെയുള്ള കൂടിക്കാഴ്ചയിൽ ഇന്റർ മിലാൻ പ്രസിഡന്റ് ബെപ്പേ മറോത്ത നിക്കോ പാസിന്റെ ഭാവിയെക്കുറിച്ച് ചർച്ചകൾ നടത്തിയിരുന്നു.

നിലവിൽ കോമോയിൽ ലോണിൽ കളിക്കുന്ന പാസിന് റയൽ മാഡ്രിഡിന്റെ പ്രധാന ടീമിൽ അവസരം ലഭിക്കാൻ പ്രയാസമുള്ളതിനാൽ ഇറ്റലിയിൽ തുടരാനാണ് താല്പര്യം.

എങ്കിലും, സ്പാനിഷ് ക്ലബ്ബ് തന്നെയാകും താരത്തിന്റെ കാര്യത്തിൽ അന്തിമ തീരുമാനം എടുക്കുക. ഈ സമ്മറിൽ 10 മില്യൺ യൂറോയ്ക്കും അടുത്ത വർഷം 11 മില്യൺ യൂറോയ്ക്കും താരത്തെ തിരിച്ചെടുക്കാനുള്ള ബൈ-ബാക്ക് ഓപ്ഷൻ റയലിനുണ്ട്.

കോമോയുടെ സാമ്പത്തിക സ്ഥിതി പരിഗണിക്കുമ്പോൾ 60 മില്യൺ യൂറോ നൽകി താരത്തെ സ്ഥിരമായി ടീമിലെത്തിക്കുക എന്നത് അവർക്ക് അസാധ്യമാണ്. അതിനാൽ ഒരു വർഷം കൂടി ലോണിൽ നിലനിർത്താനാണ് കോമോയുടെ ശ്രമം.

അവസരം ലഭിച്ചാൽ ഉടൻ ഇടപെടാനാണ് ഇന്റർ മിലാൻ തയ്യാറെടുക്കുന്നത്. ആദ്യം താരത്തിന്റെ സമ്മതം വാങ്ങിയ ശേഷം റയൽ മാഡ്രിഡുമായി ചർച്ചകൾ നടത്താനാണ് ക്ലബ്ബിന്റെ പദ്ധതി.

60 മില്യൺ യൂറോ നേരിട്ട് നൽകി താരത്തെ വാങ്ങാൻ സാധ്യത കുറവാണെങ്കിലും, ഭാവിയിൽ പണം നൽകുന്ന വ്യവസ്ഥയിലുള്ള ലോൺ കരാറുകൾ ഇന്റർ മിലാൻ പരിഗണിക്കുന്നുണ്ട്.

ഇതിനായി ഡേവിഡ് ഫ്രട്ടെസി, ലൂയിസ് എൻറിക്വെ തുടങ്ങിയ ചില താരങ്ങളെ വിൽക്കുന്നതടക്കമുള്ള കാര്യങ്ങൾ ഇന്റർ മിലാൻ ആലോചിക്കുന്നുണ്ട്.