അന്താരാഷ്ട്ര ഫുട്ബോളിൽ നിന്ന് വിരമിച്ച് ഗ്രേസ് ഡങ്മേയ്: വിരമിക്കൽ തീരുമാനം ഒരു വർഷം മുൻപേ ആലോചിച്ചതെന്ന് താരം
ഇംഫാൽ: ഇന്ത്യൻ വനിതാ ഫുട്ബോൾ താരം ഗ്രേസ് ഡങ്മേയ് അന്താരാഷ്ട്ര ഫുട്ബോളിൽ നിന്ന് വിരമിച്ചു. കഴിഞ്ഞ 13 വർഷമായി ഇന്ത്യൻ കുപ്പായത്തിൽ തിളങ്ങിയ താരം, 96 മത്സരങ്ങളിൽ നിന്നായി 24 ഗോളുകൾ നേടിയിട്ടുണ്ട്. ഗോവയിൽ നടന്ന സാഫ് (SAFF) വനിതാ ചാമ്പ്യൻഷിപ്പിൽ ബംഗ്ലാദേശിനെ 3-1ന് പരാജയപ്പെടുത്തി ഇന്ത്യ കിരീടം ചൂടിയതിന് പിന്നാലെയാണ് താരത്തിന്റെ വിരമിക്കൽ പ്രഖ്യാപനം വന്നത്.
ഒരു വർഷം മുൻപേ വിരമിക്കലിനെക്കുറിച്ച് താൻ ചിന്തിച്ചിരുന്നതായി ഗ്രേസ് വ്യക്തമാക്കുന്നു. തായ്ലൻഡിൽ നടന്ന ഏഷ്യൻ കപ്പ് യോഗ്യതാ മത്സരങ്ങൾക്ക് ശേഷം വിരമിക്കാൻ ആലോചിച്ചിരുന്നു. എങ്കിലും സാഫ് ചാമ്പ്യൻഷിപ്പിൽ വിജയിച്ച ശേഷം കരിയർ അവസാനിപ്പിക്കാൻ തീരുമാനിക്കുകയായിരുന്നു എന്ന് ഗോവയിലെ ടൂർണമെന്റിന് ശേഷം താരം പറഞ്ഞു.
ഫൈനൽ മത്സരത്തിന് തൊട്ടുമുമ്പുള്ള വാമപ്പിനിടെയാണ് ഈ തീരുമാനം സഹതാരങ്ങളോട് വെളിപ്പെടുത്തിയത്. ഫൈനലിന് മുന്നോടിയായുള്ള സമ്മർദ്ദവും ടീമിന്റെ തയ്യാറെടുപ്പുകളും ബാധിക്കരുത് എന്ന് കരുതിയാണ് നേരത്തെ ഇക്കാര്യം അറിയിക്കാതിരുന്നത്. മത്സരത്തിന്റെ 86-ാം മിനിറ്റിൽ പ്യാരി സാക്സയ്ക്ക് പകരക്കാരിയായാണ് ഗ്രേസ് അവസാനമായി ഇന്ത്യൻ ജഴ്സിയിൽ കളത്തിലിറങ്ങിയത്.
തന്റെ കരിയറിലെ ഏക ഖേദം ലോകകപ്പ് യോഗ്യത നേടാൻ സാധിച്ചില്ല എന്നത് മാത്രമാണെന്ന് 30-കാരിയായ ഗ്രേസ് പറഞ്ഞു. അതേസമയം, 2019-ൽ നേപ്പാളിൽ നടന്ന സാഫ് ചാമ്പ്യൻഷിപ്പിലെ വിജയം തന്റെ കരിയറിലെ ഏറ്റവും മികച്ച നിമിഷമായി താരം ഓർക്കുന്നു.
ഫുട്ബോളിൽ നിന്ന് മാറി മറ്റ് മേഖലകളിൽ ശ്രദ്ധ കേന്ദ്രീകരിക്കാനാണ് ഇപ്പോൾ ആഗ്രഹിക്കുന്നത്. ടീമിൽ മികച്ച യുവതാരങ്ങൾ വളർന്നുവരുന്നുണ്ട്. ഫിറ്റ്നസ് പ്രശ്നങ്ങളല്ല, മറിച്ച് ഫുട്ബോളിന് ശേഷമുള്ള ജീവിതത്തെക്കുറിച്ച് ചിന്തിക്കേണ്ട സമയമാണിതെന്ന് ഗ്രേസ് വ്യക്തമാക്കി.
2008-ൽ സ്പ്രിന്ററായി കായിക രംഗത്തെത്തിയ ഗ്രേസ്, പിന്നീട് ആകസ്മികമായാണ് ഫുട്ബോളിലെത്തിയത്. മണിപ്പൂരിലെ ചുരാചന്ദ്പൂരിലുള്ള തന്റെ നാട്ടിലെ നിലവിലെ സാഹചര്യങ്ങളിൽ താരം ആശങ്ക പ്രകടിപ്പിച്ചു. സമാധാനം ഉടൻ തിരിച്ചുവരണമെന്നും സാധാരണ നിലയിലേക്ക് കാര്യങ്ങൾ എത്തണമെന്നും താരം ആഗ്രഹം പ്രകടിപ്പിച്ചു.
അന്താരാഷ്ട്ര മത്സരങ്ങളിൽ നിന്ന് വിരമിച്ചെങ്കിലും ക്ലബ് ഫുട്ബോളിൽ ഗ്രേസ് തുടരും. ഇന്ത്യൻ വനിതാ ലീഗിൽ (IWL) കഴിഞ്ഞ കുറച്ചു വർഷങ്ങളായി പുരോഗതിയുണ്ടെങ്കിലും, കൂടുതൽ ടൂർണമെന്റുകളും മത്സരങ്ങളും സ്ത്രീകൾക്കായി വരണമെന്ന് താരം അഭിപ്രായപ്പെടുന്നു. ഭാവിയിൽ കൂടുതൽ പഠനത്തിൽ ശ്രദ്ധ കേന്ദ്രീകരിക്കാനാണ് ഗ്രേസിന്റെ തീരുമാനം. ക്ലബ് ഫുട്ബോളിൽ യാതൊരു സമ്മർദ്ദവുമില്ലാതെ കളിക്കാനാണ് താൻ ആഗ്രഹിക്കുന്നതെന്നും താരം കൂട്ടിച്ചേർത്തു.