ക്ലബ് ബ്രൂഗ് താരം ജെസ്സി ബിസിവുവിനെ സ്വന്തമാക്കാൻ ബാഴ്സലോണ ശ്രമം തുടരുന്നു
ക്ലബ് ബ്രൂഗിന്റെ യുവതാരം ജെസ്സി ബിസിവുവിനെ സൈൻ ചെയ്യാനുള്ള താല്പര്യം ബാഴ്സലോണ ഇപ്പോഴും നിലനിർത്തുന്നതായി മുണ്ടോ ഡിപോർട്ടീവോ റിപ്പോർട്ട് ചെയ്യുന്നു. ട്രാൻസ്ഫർ ചർച്ചകൾ താൽക്കാലികമായി നിർത്തിവെച്ചെങ്കിലും താരത്തെ ടീമിലെത്തിക്കാൻ ക്ലബ് സജീവമായി രംഗത്തുണ്ട്.
മികച്ച സാങ്കേതിക തികവും വേഗതയുമുള്ള യുവ ഫോർവേഡായ ബിസിവുവിനെ ഒരു വലിയ വാഗ്ദാനമായാണ് ബാഴ്സലോണ വിലയിരുത്തുന്നത്.
താരത്തിന്റെ വിപണി മൂല്യം വർധിക്കുന്നതിന് മുൻപായി ടീമിലെത്തിക്കാൻ സ്പോർട്ടിംഗ് ഡയറക്ടർ ഡെക്കോയും ഹെഡ് സ്കൗട്ട് ജോവാവോ അമരാലും നേതൃത്വം നൽകുന്നുണ്ട്.
ബാഴ്സലോണ സമർപ്പിച്ച പ്രാരംഭ ട്രാൻസ്ഫർ ഓഫർ ക്ലബ് ബ്രൂഗ് നേരത്തെ നിരസിച്ചിരുന്നു. തങ്ങൾ നിശ്ചയിച്ച തുകയിൽ കുറയാതെ വിട്ടുവീഴ്ചയില്ലെന്ന നിലപാടിലാണ് ക്ലബ് ബ്രൂഗ്.
നിലവിൽ ചർച്ചകൾ താൽക്കാലികമായി നിർത്തിവെച്ചിരിക്കുകയാണെങ്കിലും, സാമ്പത്തിക സാഹചര്യങ്ങൾ അനുകൂലമായാൽ ഉടൻ തന്നെ ഇടപെടാൻ ബാഴ്സലോണ തയ്യാറെടുക്കുന്നുണ്ട്.