ഇക്വഡോറിയൻ മിഡ്‌ഫീൽഡർ ജോസു കൈസെഡോയെ സ്വന്തമാക്കി ബാഴ്‌സലോണ. എൽ.ഡി.യു ക്വിറ്റോയിൽ നിന്നാണ് താരം ബാഴ്‌സലോണയിലേക്ക് എത്തുന്നത്. ഇതുസംബന്ധിച്ച കരാറിൽ താരം ഒപ്പുവെച്ചതായി നികോളോ ഷിറ റിപ്പോർട്ട് ചെയ്യുന്നു. Nicolo Schira.

18 വയസ്സുകാരനായ കൈസെഡോ ലോൺ അടിസ്ഥാനത്തിലാണ് കറ്റാലൻ ക്ലബ്ബിൽ ചേരുന്നത്. ഇതിൽ 2.5 മില്യൺ യൂറോയുടെ പർച്ചേസ് ഓപ്ഷനും ഉൾപ്പെടുന്നുണ്ട്. ബാഴ്‌സലോണയുടെ സീനിയർ ടീമിനായി താരം നാല് മത്സരങ്ങളിൽ കളിക്കുകയാണെങ്കിൽ ഈ ക്ലോസ് നിർബന്ധിതമായി മാറുമെന്നാണ് റിപ്പോർട്ടുകൾ.

ഭാവിയിൽ താരത്തെ കൈമാറ്റം ചെയ്യുമ്പോൾ ലഭിക്കുന്ന തുകയുടെ 20 ശതമാനം വിഹിതം എൽ.ഡി.യു ക്വിറ്റോയ്ക്ക് ലഭിക്കും. ലിയാൻ സ്‌പോർട്‌സ് ഏജൻസിയും ഏജന്റ് അന്റോണിയോ ജിയലോറെറ്റോയും ചേർന്നാണ് ഈ കൈമാറ്റം പൂർത്തിയാക്കിയത്.

ബാഴ്‌സലോണയുടെ ദീർഘകാല പദ്ധതികളുടെ ഭാഗമായാണ് കൈസെഡോയുടെ വരവ്. ലാറ്റിനമേരിക്കയിൽ നിന്നുള്ള യുവപ്രതിഭകളെ കണ്ടെത്തി ടീമിലെത്തിക്കുന്ന ക്ലബ്ബിന്റെ നയത്തിന്റെ ഭാഗമായാണ് ഈ പുതിയ സൈനിങ്.