2026 ലോകകപ്പ് സാധ്യതകൾ, മെസ്സി, റൊണാൾഡോ; തുറന്നുപറഞ്ഞ് അർജന്റീന താരം ഓസ്കാർ റൂഗേരി

2026-ലെ ഫിഫ ലോകകപ്പിന് അർജന്റീന വീണ്ടും കിരീടം നേടാൻ സാധ്യതയുണ്ടെന്ന് 1986-ലെ ലോകകപ്പ് ജേതാവായ ഓസ്കാർ റുഗേരി. ലയണൽ മെസ്സിയുടെ നേതൃത്വത്തിലുള്ള അർജന്റീന ടീം ഇപ്പോൾ വളരെ മികച്ച ഫോമിലാണെന്നും റുഗേരി പറഞ്ഞു.

ഫുട്ബോൾ ലോകത്ത് എന്നും ചർച്ചയാകുന്ന മെസ്സിയും മറഡോണയും തമ്മിലുള്ള താരതമ്യത്തെ റുഗേരി തള്ളിക്കളഞ്ഞു. ഇരുവരും അർജന്റീനയുടെ ഇതിഹാസങ്ങളാണെന്നും അവരെ തമ്മിൽ താരതമ്യം ചെയ്യുന്നതിന് പകരം ഒന്നിച്ച് ആസ്വദിക്കുകയാണ് വേണ്ടതെന്നും അദ്ദേഹം വ്യക്തമാക്കി.

മെസ്സിയെ റൊണാൾഡോയുമായി താരതമ്യം ചെയ്യുന്നതിനോട് റുഗേരിക്ക് യോജിപ്പില്ല. മെസ്സി ഒരു പ്രതിഭയാണെന്നും എന്നാൽ റൊണാൾഡോ വെറുമൊരു സൂപ്പർ താരം മാത്രമാണെന്നുമാണ് അദ്ദേഹത്തിന്റെ പക്ഷം.

അർജന്റീനയുടെ പ്രതിരോധ നിരയിലെ ക്രിസ്റ്റ്യൻ റൊമേറോയെ റുഗേരി വാനോളം പുകഴ്ത്തി. റയൽ മാഡ്രിഡ് പോലുള്ള വലിയ ക്ലബ്ബുകൾ റൊമേറോയെ ടീമിലെത്തിക്കാൻ ശ്രമിക്കണമെന്നും അദ്ദേഹം പറഞ്ഞു.

ജൂലിയൻ അൽവാരസിനെപ്പോലെ ഒരു താരം ടീമിലുള്ളത് വലിയ മുതൽക്കൂട്ടാണ്. സ്‌പെയിൻ, ഫ്രാൻസ്, ഇംഗ്ലണ്ട്, ജർമ്മനി എന്നീ ടീമുകളും ലോകകപ്പിൽ അർജന്റീനയ്ക്ക് വെല്ലുവിളിയാകാൻ സാധ്യതയുണ്ടെന്നും അദ്ദേഹം കൂട്ടിച്ചേർത്തു.

ലയണൽ സ്കലോണിയുടെ നേതൃത്വത്തിലുള്ള പരിശീലക സംഘം അർജന്റീന ടീമിനെ വളരെ മികച്ച രീതിയിലാണ് കെട്ടിപ്പടുത്തിരിക്കുന്നത്. പുതിയ താരങ്ങളെ കണ്ടെത്തുന്നതിലും അവർ വലിയ വിജയം കൈവരിച്ചിട്ടുണ്ട്.