ഗലാറ്റസറേയ്ക്കായി ചാമ്പ്യൻസ് ലീഗിൽ മികച്ച പ്രകടനം പുറത്തെടുക്കുന്ന ഉഗുർകാൻ കാകിറിനെ ബയേൺ മ്യൂണിക്ക് നിരീക്ഷിക്കുന്നു.

തുർക്കിഷ് താരത്തിനായി ഏകദേശം 30 ദശലക്ഷം യൂറോയുടെ പ്രാഥമിക ഓഫർ നൽകാൻ ബയേൺ തയ്യാറെടുക്കുകയാണ്. എന്നാൽ, ഗലാറ്റസറേയുടെ പ്രതീക്ഷകൾക്കൊത്തുള്ള തുകയല്ല ഇതെന്നാണ് സൂചന.

ട്രാബ്സോൺസ്പോറിൽ നിന്ന് 27.5 ദശലക്ഷം യൂറോയ്ക്ക് എത്തിയ കാകിർ, ക്ലബ് ഇതിഹാസം ഫെർണാണ്ടോ മുസ്ലേരയുടെ പിൻഗാമിയായി ചുരുങ്ങിയ കാലം കൊണ്ട് തന്നെ ടീമിൽ നിർണ്ണായക സ്ഥാനമുറപ്പിച്ചു.

പ്രത്യേകിച്ച് ലിവർപൂളിനെതിരായ ചാമ്പ്യൻസ് ലീഗ് പ്രീക്വാർട്ടർ പോരാട്ടത്തിലെ മികച്ച പ്രകടനം കാകിറിന്റെ ഖ്യാതി വർദ്ധിപ്പിച്ചു.

ഗലാറ്റസറേ പുറത്തായെങ്കിലും, ആൻഫീൽഡിൽ നടന്ന രണ്ടാം പാദ മത്സരത്തിൽ 11 സേവുകൾ നടത്തി കാകിർ ശ്രദ്ധേയനായി. കഴിഞ്ഞ പത്ത് വർഷത്തിനിടയിൽ ചാമ്പ്യൻസ് ലീഗ് നോക്കൗട്ട് മത്സരത്തിൽ ഒരു ഗോൾകീപ്പർ നടത്തുന്ന ഏറ്റവും ഉയർന്ന സേവ് കണക്കാണിത്.

റാംസ് പാർക്കിൽ നടന്ന ആദ്യ പാദത്തിൽ ഏഴ് സേവുകൾ നടത്തി താരം ക്ലീൻ ഷീറ്റ് നിലനിർത്തിയിരുന്നു. ഈ മത്സരത്തിൽ ഗലാറ്റസറേ 1-0ത്തിന് വിജയിക്കുകയും ചെയ്തു.

വേനൽക്കാല ട്രാൻസ്ഫർ ജാലകത്തിന് മുന്നോടിയായി ബയേണിന്റെ താൽപ്പര്യം കൂടുതൽ ശക്തമാകാനാണ് സാധ്യത. എന്നാൽ, ടീമിലെ താരത്തിന്റെ പ്രാധാന്യം കണക്കിലെടുത്ത് നിലവിലെ തുകയ്ക്ക് താരത്തെ വിട്ടുനൽകാൻ ഗലാറ്റസറേ തയ്യാറായേക്കില്ല.