യുവന്റസിലെ തന്റെ ഫുട്ബോൾ കരിയറിനെക്കുറിച്ച് തുറന്നുപറഞ്ഞ് മുൻ താരം ഫാബ്രിസിയോ മിക്കോളി. ടൂറിനിലെ തന്റെ കാലഘട്ടം വളരെ പ്രയാസകരമായിരുന്നുവെന്നും, കളിക്കളത്തിന് പുറത്തെ ചില തീരുമാനങ്ങൾ തന്റെ കരിയറിനെ ദോഷകരമായി ബാധിച്ചിട്ടുണ്ടാകാമെന്നും അദ്ദേഹം വ്യക്തമാക്കി.

ലാ ഗസെറ്റ ഡെല്ലോ സ്പോർട്ടിന് നൽകിയ അഭിമുഖത്തിലാണ് മിക്കോളി ഇക്കാര്യങ്ങൾ പറഞ്ഞത്. അലസ്സാൻഡ്രോ മൊഗ്ഗിയുമായി ബന്ധമുള്ള ‘ജീ’ (Gea) ഏജൻസിയിൽ ഒപ്പിടാൻ അന്റോണിയോ കോണ്ടെ ഉൾപ്പെടെയുള്ളവർ തന്നെ നിർബന്ധിച്ചിരുന്നുവെന്ന് അദ്ദേഹം വെളിപ്പെടുത്തി. എന്നാൽ, തനിക്ക് അന്ന് കലിയാൻഡ്രോ എന്ന ഏജന്റ് ഉണ്ടായിരുന്നതിനാൽ ആ ആവശ്യം താൻ നിരസിക്കുകയായിരുന്നു.

“പിന്നീട് നടന്ന കാര്യങ്ങൾ പ്രതികാരമായിരുന്നോ എന്ന് എനിക്കറിയില്ല. മൊഗ്ഗി സീനിയർ എന്റെ ടാറ്റൂ, കമ്മൽ, മുടി എന്നിവയെക്കുറിച്ച് കളിയാക്കാറുണ്ടായിരുന്നു. ഫിയോറന്റീനയിലെ ലോൺ കാലാവധി കഴിഞ്ഞ് തിരിച്ചെത്തിയപ്പോൾ ടീം ബസ്സിൽ വെച്ച് ഒരു സംഭവമുണ്ടായി. അവർ സ്കുഡെറ്റോ നേടിയ ശേഷം ആഘോഷങ്ങൾക്കായി ടൗൺ ഹാളിലേക്ക് പോയപ്പോൾ, എന്നെ മാത്രം ബസ്സിൽ തനിച്ചാക്കി. അതൊരു അപമാനകരമായ അനുഭവമായിരുന്നു,” മിക്കോളി പറഞ്ഞു.

ആ കാലഘട്ടത്തിന് ശേഷം തന്നെ എസ്എൽ ബെൻഫിക്കയിലേക്ക് വിറ്റുവെന്നും അദ്ദേഹം കൂട്ടിച്ചേർത്തു. എങ്കിലും താൻ എടുത്ത തീരുമാനങ്ങളിൽ ഖേദമില്ലെന്നും, ഏജന്റിനെ മാറ്റാൻ സമ്മതിച്ചിരുന്നെങ്കിൽ കരിയർ എങ്ങനെ മാറുമായിരുന്നു എന്ന് ഇപ്പോഴും ചിന്തിക്കാറുണ്ടെന്നും മിക്കോളി വ്യക്തമാക്കി.

ഫുട്ബോളിലെ വിശ്വസ്തതയെക്കുറിച്ചും ബന്ധങ്ങളെക്കുറിച്ചും സംസാരിച്ച അദ്ദേഹം, തന്റെ ഏജന്റ് കലിയാൻഡ്രോയുമായുള്ള ദീർഘകാല ബന്ധം പിന്നീട് വഷളായെന്നും തുറന്നുപറഞ്ഞു.

എല്ലാ വിവാദങ്ങൾക്കിടയിലും, തന്റെ വ്യക്തിപരമായ അനുഭവത്തിൽ ലൂസിയാനോ മൊഗ്ഗി ഒരു നല്ല മനുഷ്യനായാണ് തോന്നിയതെന്നും അദ്ദേഹം പറഞ്ഞു.