ഇന്ത്യൻ ഫുട്ബോളിന് അന്താരാഷ്ട്ര തലത്തിൽ കൂടുതൽ തിളങ്ങാൻ കഴിയുമെന്നും, വിദേശത്ത് വളർന്നുവരുന്ന ഇന്ത്യൻ വംശജരായ താരങ്ങളെ ടീമിലെത്തിക്കുന്നത് മികച്ചൊരു നീക്കമായിരിക്കുമെന്നും ജംഷഡ്പൂർ എഫ്സി പരിശീലകൻ ഓവൻ കോയൽ അഭിപ്രായപ്പെടുന്നു. അടുത്തിടെ നടന്ന ഏഷ്യൻ കപ്പ് യോഗ്യതാ മത്സരത്തിൽ റയാൻ വില്യംസ് നേടിയ ഗോൾ ഇന്ത്യൻ ഫുട്ബോളിന് നൽകിയ ആത്മവിശ്വാസം ചെറുതല്ലെന്നും അദ്ദേഹം ചൂണ്ടിക്കാട്ടുന്നു.
ഓസ്ട്രേലിയയിൽ ജനിച്ചുവളർന്ന റയാൻ വില്യംസിനെപ്പോലെയുള്ള കൂടുതൽ താരങ്ങളെ കണ്ടെത്തുന്നത് ഇന്ത്യൻ ഫുട്ബോളിന് വലിയ മുതൽക്കൂട്ടായിരിക്കുമെന്ന് കോയൽ വിശ്വസിക്കുന്നു. സമാനമായ രീതിയിൽ വിദേശത്ത് വളർന്നുവരുന്ന, എന്നാൽ ഇന്ത്യയെ പ്രതിനിധീകരിക്കാൻ യോഗ്യതയുള്ള മികച്ച താരങ്ങൾ ഇനിയും പുറത്തുണ്ട്. അവരെ കണ്ടെത്തി അവസരം നൽകുക എന്നത് ഫുട്ബോളിന്റെ വളർച്ചയ്ക്ക് അത്യാവശ്യമാണെന്ന് അദ്ദേഹം പറയുന്നു.
തന്റെ സ്വന്തം അനുഭവവും കോയൽ ഇതിനായി ചൂണ്ടിക്കാട്ടുന്നു. സ്കോട്ട്ലൻഡിൽ ജനിച്ച താൻ അയർലൻഡിലാണ് വളർന്നതെന്നും, പിന്നീട് അയർലൻഡ് ടീമിന് വേണ്ടി അന്താരാഷ്ട്ര ഫുട്ബോൾ കളിക്കാൻ തനിക്ക് സാധിച്ചുവെന്നും അദ്ദേഹം ഓർമ്മിപ്പിച്ചു. ഐഎസ്എൽ പോലുള്ള ടൂർണമെന്റുകളിലൂടെ ഇന്ത്യൻ ഫുട്ബോൾ ഇതിനകം തന്നെ പല കാര്യങ്ങളും ശരിയായ ദിശയിലാണെന്നും, ഇത്തരം മാറ്റങ്ങളിലൂടെ കൂടുതൽ ഉയരങ്ങളിലെത്താൻ ഇന്ത്യക്ക് കഴിയുമെന്നും കോയൽ കൂട്ടിച്ചേർത്തു.