“ആഴ്‌സണൽ പ്രീമിയർ ലീഗ് കിരീടം നേടുമെന്ന് ഞാൻ കരുതുന്നു. മാഞ്ചസ്റ്റർ സിറ്റിയോട് ആഴ്‌സണൽ പരാജയപ്പെട്ടപ്പോഴും ഇതേ വിശ്വാസമാണ് എനിക്കുണ്ടായിരുന്നത്. സിറ്റിയുടെ മൈതാനത്ത് കളിക്കേണ്ടി വന്നതും, കപ്പ് ഫൈനലിലെ തോൽവിയും ആഴ്‌സണൽ താരങ്ങളുടെ മനസ്സിൽ സമ്മർദ്ദമുണ്ടാക്കിയിരുന്നു. എന്നാൽ, സിറ്റിക്കെതിരായ തോൽവിക്ക് ശേഷവും പോയിന്റ് പട്ടികയിൽ ഒപ്പത്തിനൊപ്പം നിൽക്കാൻ അവർക്ക് സാധിച്ചു. ആഴ്‌സണലിന്റെ വരാനിരിക്കുന്ന മത്സരങ്ങൾ താരതമ്യേന എളുപ്പമുള്ളതാണെന്നും ഞാൻ കരുതുന്നു. അവർ കളിക്കുന്ന എല്ലാ മത്സരങ്ങളും വിജയിക്കുമെന്നും, എന്നാൽ സിറ്റി ഒന്നോ രണ്ടോ മത്സരങ്ങളിൽ ഇടറി വീഴുമെന്നും എനിക്ക് തോന്നുന്നു,” റൂണി പറഞ്ഞു.

“മൂന്നോ അഞ്ചോ പോയിന്റ് വ്യത്യാസത്തിൽ ആഴ്‌സണൽ ലീഗ് കിരീടം സ്വന്തമാക്കുമെന്നാണ് എന്റെ വിശ്വാസം. സീസണിലുടനീളം മികച്ച പ്രകടനമാണ് അവർ കാഴ്ചവെച്ചത്, ലീഗിൽ കൂടുതൽ സമയവും ഒന്നാമത് തുടരാനും അവർക്ക് സാധിച്ചു.”

“എല്ലാവരെയും ആകർഷിക്കുന്ന ശൈലിയല്ല ആഴ്‌സണലിന്റേതെങ്കിലും, അവർക്ക് വിജയിക്കാൻ കൃത്യമായ ഒരു മാർഗമുണ്ട്. സിറ്റിയുടെ മത്സരങ്ങൾ വളരെ തിരക്കേറിയതാണ്. സീസൺ മുഴുവൻ മികച്ച നിലവാരം പുലർത്തിയ ആഴ്‌സണലിന് ഇത് അവരുടെ വർഷമായിരിക്കും,” റൂണി കൂട്ടിച്ചേർത്തു.