പ്രീമിയർ ലീഗ് കിരീടപ്പോരാട്ടത്തിൽ ആഴ്സണലുമായുള്ള പോയിന്റ് വ്യത്യാസം രണ്ട് പോയിന്റായി കുറച്ച് മാഞ്ചസ്റ്റർ സിറ്റി തങ്ങളുടെ സാധ്യതകൾ നിലനിർത്തി. ക്രിസ്റ്റൽ പാലസിനെ എതിരില്ലാത്ത മൂന്ന് ഗോളുകൾക്ക് തകർത്താണ് സിറ്റി വിജയത്തോടെ കുതിപ്പ് തുടരുന്നത്. ഇതോടെ ലീഗ് കിരീടം ആർക്കെന്ന് തീരുമാനിക്കാൻ അവസാന ഘട്ടം വരെ കാത്തിരിക്കേണ്ടി വരുമെന്ന് ഉറപ്പായി.
അടുത്ത തിങ്കളാഴ്ച ബേൺലിക്കെതിരെ നടക്കുന്ന മത്സരത്തിൽ ആഴ്സണൽ വിജയിച്ചാൽ, തൊട്ടടുത്ത ദിവസം ബോൺമൗത്തിനെതിരെ സിറ്റിക്ക് നിർബന്ധമായും ജയിക്കേണ്ടി വരും. അവസാന നിമിഷം വരെ എന്തു സംഭവിക്കുമെന്ന് പറയാനാകില്ലെന്നും തങ്ങളുടെ കർത്തവ്യം കൃത്യമായി ചെയ്യാനാണ് ശ്രമിക്കുന്നതെന്നും സിറ്റി താരം ഫിൽ ഫോഡൻ പ്രതികരിച്ചു. എഫ്എ കപ്പ് ഫൈനൽ മുന്നിൽ കണ്ട് പരിശീലകൻ പെപ് ഗ്വാർഡിയോള ടീമിൽ ആറ് മാറ്റങ്ങൾ വരുത്തിയിട്ടും മികച്ച പ്രകടനമാണ് സിറ്റി കാഴ്ചവെച്ചത്.
ആദ്യ പകുതിയിൽ ഫിൽ ഫോഡൻ നൽകിയ രണ്ട് സുന്ദരമായ അസിസ്റ്റുകളാണ് സിറ്റിയുടെ വിജയത്തിന് അടിത്തറയിട്ടത്. 32-ാം മിനിറ്റിൽ അന്റോയ്ൻ സെമെന്യോയും 40-ാം മിനിറ്റിൽ ഒമർ മാർമൂഷും ലക്ഷ്യം കണ്ടു. 84-ാം മിനിറ്റിൽ സാവിഞ്ഞോ കൂടി ഗോൾ അടിച്ചതോടെ സിറ്റി വിജയം ഉറപ്പിച്ചു. ഈ വിജയത്തോടെ ഗോൾ വ്യത്യാസത്തിൽ ആഴ്സണലിനെ മറികടക്കാനും സിറ്റിക്ക് കഴിഞ്ഞു. കിരീടം ഇപ്പോൾ തങ്ങളുടെ കൈയിലല്ലെങ്കിലും അവസാന ശ്വാസം വരെ പൊരുതുമെന്ന് ഗ്വാർഡിയോള വ്യക്തമാക്കി.
There are now only two days when the Premier League title can be won…
— Premier League (@premierleague) May 13, 2026