ശനിയാഴ്ച ബുഡാപെസ്റ്റിൽ നടക്കുന്ന ചാമ്പ്യൻസ് ലീഗ് ഫൈനലിൽ ആഴ്സണൽ തങ്ങളുടെ കന്നി കിരീടം സ്വന്തമാക്കുമെന്ന് ക്ലബ്ബ് ഇതിഹാസം സോൾ കാംബെൽ. പിഎസ്ജിക്കെതിരായ മത്സരത്തിൽ ആഴ്സണൽ 3-2 എന്ന സ്കോറിന് വിജയിക്കുമെന്നാണ് കാംബെലിന്റെ പ്രവചനം. ലഭിക്കുന്ന അവസരങ്ങൾ കൃത്യമായി മുതലെടുക്കാൻ ആർട്ടെറ്റയുടെ സംഘം ശ്രദ്ധിക്കണമെന്നും അദ്ദേഹം ഓർമ്മിപ്പിച്ചു.

“ആഴ്സണൽ താരങ്ങൾ അവസരങ്ങൾ കൃത്യമായി ഉപയോഗിച്ചാൽ അവർക്ക് വലിയ സാധ്യതയുണ്ട്, കാരണം മികച്ചൊരു ടീമാണ് അവർ,” ഫുട്ബോൾ ലണ്ടനോട് കാംബെൽ പറഞ്ഞു. “ഇതൊരു ഉയർന്ന സ്കോറിംഗ് മത്സരമായിരിക്കും. ആഴ്സണൽ 3-2ന് വിജയിക്കുമെന്ന് ഞാൻ കരുതുന്നു. ടീം അവരുടെ മികച്ച പ്രകടനം പുറത്തെടുക്കും. ഫുട്ബോളിൽ എപ്പോഴും ചെറിയൊരു ഭാഗ്യം കൂടി ആവശ്യമാണ്,” അദ്ദേഹം കൂട്ടിച്ചേർത്തു.

ചാമ്പ്യൻസ് ലീഗ് ഫൈനലിലെ തന്റെ കയ്പേറിയ അനുഭവങ്ങൾ കാംബെൽ പങ്കുവെച്ചു. 2006-ൽ പാരിസിൽ നടന്ന ഫൈനലിൽ കാംബെല്ലിന്റെ ഹെഡറിലൂടെ ആഴ്സണൽ 1-0ത്തിന് മുന്നിലെത്തിയിരുന്നു. എന്നാൽ പതിനെട്ടാം മിനിറ്റിൽ ജെൻസ് ലെമാൻ ചുവപ്പ് കാർഡ് കണ്ട് പുറത്തായത് മത്സരത്തിന്റെ ഗതിമാറ്റി. പിന്നീട് സാമുവൽ എറ്റോയും ജൂലിയാനോ ബെല്ലെറ്റിയും നേടിയ ഗോളുകൾ ആഴ്സണലിന്റെ സ്വപ്നം തകർത്തു.

“നിർണ്ണായകമായ നിമിഷങ്ങളാണ് ഫൈനലുകളിൽ വിജയപരാജയങ്ങൾ തീരുമാനിക്കുന്നത്,” കാംബെൽ വ്യക്തമാക്കി. “പ്രതിരോധം ശക്തമാക്കുക, അതേസമയം അവസരം ലഭിക്കുമ്പോൾ അത് ഗോളാക്കി മാറ്റുക. വീണ്ടും അങ്ങനെയൊരു അവസരം ലഭിക്കുമോ എന്ന് പറയാനാകില്ല.”

ആഴ്സണൽ പ്രതിരോധനിരയ്ക്ക് മുന്നിലുള്ള വെല്ലുവിളിയെക്കുറിച്ച് മുൻ സെന്റർ-ബാക്ക് തുറന്നുപറഞ്ഞു. 2006-ൽ റൊണാൾഡീഞ്ഞോയെയും എറ്റോയെയും തടഞ്ഞതുപോലെ, ഉസ്മാൻ ഡെംബെലെയെയും ഖ്വിച്ച ക്വാററ്റ്സ്ഖേലിയയെയും തടയുക എന്നത് വലിയൊരു ദൗത്യമാണെന്ന് അദ്ദേഹം പറഞ്ഞു.

കഴിഞ്ഞ സീസണിലെ ചാമ്പ്യൻമാരായ പിഎസ്ജിയാണ് ആഴ്സണലിന്റെ എതിരാളികൾ. 2016-17 കാലഘട്ടത്തിൽ റയൽ മാഡ്രിഡ് നേടിയതുപോലെ തുടർച്ചയായി രണ്ട് തവണ യൂറോപ്യൻ ചാമ്പ്യൻമാരാകാനുള്ള ലക്ഷ്യവുമായാണ് പിഎസ്ജി ഇറങ്ങുന്നത്.