ഇന്റർ മയാമി താരവും അർജന്റീന ഫുട്ബോൾ ടീം ക്യാപ്റ്റനുമായ ലയണൽ മെസിയെ 2026-ലെ പ്രിൻസസ് ഓഫ് അസ്റ്റൂറിയസ് കായിക പുരസ്‌കാരത്തിന് തിരഞ്ഞെടുത്തു.

ഏഴ് തവണ പാരാലിമ്പിക് നീന്തൽ ചാമ്പ്യനായ തെരേസ പെരാലെസ് അധ്യക്ഷയായ ജൂറിയാണ് മെസിയെ പുരസ്‌കാരത്തിനായി തിരഞ്ഞെടുത്തത്. 12 രാജ്യങ്ങളിൽ നിന്നായി ആകെ 27 പേർ ഈ വർഷത്തെ പട്ടികയിലുണ്ടായിരുന്നു.

“അദ്ദേഹത്തിന്റെ മികച്ച കായിക മികവിനും കരിയറിനും പുറമെ, ഏറ്റവും ദുർബലരായ ജനവിഭാഗങ്ങളിലെ കുട്ടികൾക്ക് വിദ്യാഭ്യാസം, ആരോഗ്യം എന്നിവ ലഭ്യമാക്കുന്നതിനായി നടത്തുന്ന വലിയ തോതിലുള്ള ജീവകാരുണ്യ പ്രവർത്തനങ്ങളും പരിഗണിച്ചു. മൈതാനത്തെ മാതൃകാപരമായ പെരുമാറ്റം, സ്ഥിരത, എളിമ, ടീമിനോടുള്ള അർപ്പണബോധം എന്നിവയിലൂടെ അദ്ദേഹം ലോകമെമ്പാടുമുള്ളവരുടെ ആദരവും അംഗീകാരവും നേടിയിട്ടുണ്ട്,” എന്ന് തെരേസ പെരാലെസ് വ്യക്തമാക്കി.

1980 മുതൽ സ്‌പാനിഷ് കിരീടാവകാശി നൽകി വരുന്ന പ്രിൻസസ് ഓഫ് അസ്റ്റൂറിയസ് പുരസ്‌കാരം എട്ട് വ്യത്യസ്ത വിഭാഗങ്ങളിലായാണ് നൽകുന്നത്. ഇതിൽ കായിക വിഭാഗം 1987-ലാണ് ഉൾപ്പെടുത്തിയത്. പ്രിൻസസ് ഓഫ് അസ്റ്റൂറിയസ് പുരസ്‌കാരം വ്യക്തിഗതമായി ലഭിക്കുന്ന ആദ്യത്തെ ഫുട്ബോൾ താരമാണ് മെസി എന്നത് ശ്രദ്ധേയമാണ്. 2010-ൽ സ്‌പെയിൻ ദേശീയ ടീമിനും, 2012-ൽ ഐകർ കാസില്ലാസ്, സാവി എന്നിവർ പങ്കിട്ടുമാണ് ഈ പുരസ്‌കാരം ലഭിച്ചത്.