ആർബി ലെയ്പ്‌സിഗ് സ്‌ട്രൈക്കർ യാൻ ഡിയോമാൻഡെ തനിക്ക് പാരീസ് സെന്റ് ജെർമെയ്‌നോട് (പിഎസ്‌ജി) പണ്ടുമുതലേയുള്ള ആരാധന വെളിപ്പെടുത്തി. എന്നാൽ, തുടർച്ചയായി രണ്ടാം തവണയും ചാമ്പ്യൻസ് ലീഗ് ജേതാക്കളായ പിഎസ്‌ജിയിലേക്ക് വേനൽക്കാലത്ത് കൂടുമാറുമോ എന്ന ചോദ്യത്തോട് താരം വ്യക്തമായ മറുപടി നൽകിയില്ല.

ഫ്രാൻസും ഐവറി കോസ്റ്റും തമ്മിലുള്ള സൗഹൃദ മത്സരത്തിന് മുന്നോടിയായി മാധ്യമങ്ങളോട് സംസാരിക്കവെയാണ് 19-കാരനായ താരം പിഎസ്‌ജിയുടെ താൽപ്പര്യത്തെക്കുറിച്ച് പ്രതികരിച്ചത്. “ചെറുപ്പം മുതലേ ഞാൻ ഇഷ്ടപ്പെടുന്ന ക്ലബ്ബാണ് പിഎസ്‌ജി. എന്നാൽ നിലവിൽ ഭാവിയിലേക്ക് നോക്കുന്നില്ല. ലോകകപ്പിലാണ് എന്റെ പൂർണ്ണ ശ്രദ്ധ. ടൂർണമെന്റിന് ശേഷം ബാക്കി കാര്യങ്ങൾ തീരുമാനിക്കും,” അദ്ദേഹം പറഞ്ഞു.

ലെയ്പ്‌സിഗിനായി മികച്ച പ്രകടനം കാഴ്ചവെച്ച ഐവറി കോസ്റ്റ് താരത്തെ സ്വന്തമാക്കാൻ യൂറോപ്പിലെ മുൻനിര ക്ലബ്ബുകൾ രംഗത്തുണ്ട്. ഇതിനകം ഒമ്പത് അന്താരാഷ്ട്ര മത്സരങ്ങളിൽ ഐവറി കോസ്റ്റിനായി കളിച്ച താരം, ടൂർണമെന്റ് കഴിയുന്നത് വരെ ട്രാൻസ്ഫർ സംബന്ധമായ ചർച്ചകളിലേക്ക് കടക്കാൻ താല്പര്യപ്പെടുന്നില്ലെന്ന് വ്യക്തമാക്കി.