ബ്രൈട്ടൺ സ്പോർട്ടിംഗ് ഡയറക്ടർ ജേസൺ ഐറ്റോ ക്ലബ്ബിൽ നിന്ന് പടിയിറങ്ങിയതായി ഔദ്യോഗിക സ്ഥിരീകരണം. ഉടൻ പ്രാബല്യത്തിൽ വരുന്ന രീതിയിലാണ് ജേസൺ ഐറ്റോയുടെ മടക്കം.

41 വയസ്സുകാരനായ ഐറ്റോ 2025 സെപ്റ്റംബറിലാണ് അമെക്സ് സ്റ്റേഡിയത്തിൽ ചുമതലയേറ്റത്. സൗത്ത് കോസ്റ്റ് ക്ലബ്ബിന്റെ ചരിത്രത്തിൽ ഈ പദവി വഹിക്കുന്ന ആദ്യ വ്യക്തിയായിരുന്നു അദ്ദേഹം.

അദ്ദേഹം സ്ഥാനമൊഴിഞ്ഞതിൻ്റെ വ്യക്തമായ കാരണങ്ങൾ ഇതുവരെ പുറത്തുവിട്ടിട്ടില്ല. സമ്മർ ട്രാൻസ്ഫർ ജാലകം തുറക്കാൻ രണ്ടാഴ്ചയിൽ താഴെ മാത്രം സമയം ബാക്കിനിൽക്കെ, ക്ലബ്ബിന്റെ ട്രാൻസ്ഫർ തന്ത്രങ്ങൾക്ക് നേതൃത്വം നൽകിയ വ്യക്തി പെട്ടെന്ന് പടിയിറങ്ങിയത് ഫുട്ബോൾ ലോകത്ത് അസാധാരണ നടപടിയായി മാറുകയാണ്.

“ഞങ്ങൾക്ക് വേണ്ടി ജേസൺ ചെയ്ത എല്ലാ കാര്യങ്ങൾക്കും നന്ദി പറയുന്നു, അദ്ദേഹത്തിന്റെ ഭാവിക്ക് എല്ലാവിധ ആശംസകളും നേരുന്നു,” എന്ന് ബ്രൈട്ടൺ ചെയർമാൻ ടോണി ബ്ലൂം പ്രതികരിച്ചു.

ആഴ്സണലിൽ ഒരു പതിറ്റാണ്ടിലേറെക്കാലം പ്രവർത്തിച്ച ശേഷമാണ് ഐറ്റോ ബ്രൈട്ടണിലെത്തിയത്. ആഴ്സണലിൽ ഇടക്കാല സ്പോർട്ടിംഗ് ഡയറക്ടർ ഉൾപ്പെടെയുള്ള വിവിധ പദവികൾ അദ്ദേഹം വഹിച്ചിട്ടുണ്ട്.