യുവന്റസിൽ ഒരു സീസൺ മാത്രം പൂർത്തിയാക്കിയ ബെൽജിയൻ സ്ട്രൈക്കർ ലൂയിസ് ഒപെൻഡയെ വിൽക്കാൻ ക്ലബ്ബ് തയ്യാറെടുക്കുന്നു. ക്ലബ്ബിന്റെ പ്രതീക്ഷയ്ക്കൊത്തുയരാൻ താരത്തിന് കഴിഞ്ഞില്ലെന്ന് വിലയിരുത്തലിനെ തുടർന്നാണ് ഈ തീരുമാനം.

പ്രമുഖ മാധ്യമപ്രവർത്തകൻ ഡി മാർസിയോയുടെ റിപ്പോർട്ടുകൾ പ്രകാരം, മൊണാക്കോ, ഐൻട്രാക്റ്റ് ഫ്രാങ്ക്ഫർട്ട്, നോട്ടിംഗ്ഹാം ഫോറസ്റ്റ് എന്നീ ക്ലബ്ബുകൾ മുൻ ലൈപ്സിഗ് താരമായ ഒപെൻഡയിൽ താൽപ്പര്യം പ്രകടിപ്പിച്ചിട്ടുണ്ട്. താരത്തെ ലോൺ അടിസ്ഥാനത്തിൽ സ്വന്തമാക്കാനും പിന്നീട് സ്ഥിരമായി വാങ്ങാനുള്ള ഓപ്ഷനും ഉൾപ്പെട്ട കരാറാണ് ഈ ക്ലബ്ബുകൾ മുന്നോട്ടുവെച്ചിരിക്കുന്നത്.

ഡുസാൻ വ്ലാഹോവിച്ച് ഫ്രീ ഏജന്റായി ക്ലബ്ബ് വിടാൻ തീരുമാനിച്ച സാഹചര്യത്തിൽ, ഒപെൻഡയുടെ പുറത്തുപോകൽ പുതിയ സ്ട്രൈക്കർമാരെ ടീമിലെത്തിക്കാൻ യുവന്റസിനെ സഹായിക്കും.

അത്ലറ്റികോ മാഡ്രിഡിന്റെ അലക്സാണ്ടർ സോർലോത്ത്, പിഎസ്ജിയുടെ റാൻഡൽ കോലോ മുവാനി എന്നിവരെയാണ് യുവന്റസ് നിലവിൽ പ്രധാനമായും ലക്ഷ്യമിടുന്നത്.