ബയേൺ മ്യൂണിക്കിന്റെ പരിശീലകനായി വിൻസെന്റ് കമ്പനി പിന്നിട്ട ആദ്യ രണ്ട് വർഷങ്ങളെ വാനോളം പുകഴ്ത്തി ഫ്രഞ്ച് ഫുട്ബോൾ ഇതിഹാസം തിയറി ഹെൻറി.

തുടക്കത്തിൽ കമ്പനിയെ നിയമിച്ചതിനെതിരെ പലരും സംശയം പ്രകടിപ്പിച്ചിരുന്നുവെങ്കിലും, ഇപ്പോൾ മികച്ച ഫലങ്ങൾ കാഴ്ചവെച്ചുകൊണ്ട് അദ്ദേഹം എല്ലാവരെയും നിശബ്ദരാക്കിയെന്ന് ഹെൻറി പറഞ്ഞു.

“ആദ്യം പലരും അദ്ദേഹം ഇതിന് യോജിച്ച വ്യക്തിയല്ലെന്ന് കരുതിയിരുന്നു. എന്നാൽ വളരെ മികച്ച ജോലിയാണ് അദ്ദേഹം അവിടെ ചെയ്യുന്നത്,” സ്പോർട്സ് ഇല്ലസ്ട്രേറ്റഡിനോട് സംസാരിക്കവെ ഹെൻറി വ്യക്തമാക്കി. “അദ്ദേഹത്തെപ്പോലെ ഒരാളെ ശരിയായ സ്ഥാനത്ത്, അദ്ദേഹത്തെ മനസ്സിലാക്കുന്ന ആളുകൾക്കൊപ്പം നിയമിക്കുമ്പോൾ ഇന്നത്തെ ബയേൺ മ്യൂണിക്കിനെ നമുക്ക് ലഭിക്കുന്നു.”

ബൽജിയം ദേശീയ ടീമിന്റെ സഹപരിശീലകനായി കമ്പനി പ്രവർത്തിച്ചിരുന്ന സമയത്ത് അദ്ദേഹത്തോടൊപ്പം പ്രവർത്തിക്കാൻ ഹെൻറിക്ക് സാധിച്ചിരുന്നു. ഇതാണ് കമ്പനിയുടെ കഴിവുകളെ അടുത്തറിയാൻ ഹെൻറിയെ സഹായിച്ചത്.

“അന്ന് തന്നെ അദ്ദേഹത്തിന്റെ ബുദ്ധിശക്തി എത്രത്തോളമാണെന്ന് നമുക്ക് കാണാൻ കഴിയുമായിരുന്നു,” ഹെൻറി ഓർക്കുന്നു. “അദ്ദേഹം പല ഭാഷകൾ കൈകാര്യം ചെയ്യുന്നു, തനിക്ക് എന്താണ് വേണ്ടതെന്ന് അദ്ദേഹത്തിന് കൃത്യമായ ബോധ്യമുണ്ട്. തീരുമാനങ്ങൾ എടുക്കുന്നതിൽ അദ്ദേഹം മടികാണിക്കാറില്ല. ഒരു ശക്തനായ നേതാവായ അദ്ദേഹം ശരിയായ കളിക്കാർ കൂടെയുള്ളപ്പോൾ മികച്ച ഫലങ്ങൾ നൽകുമെന്ന് തെളിയിച്ചിട്ടുണ്ട്.”

കമ്പനിയെ നിയമിച്ച ബയേൺ മ്യൂണിക്ക് മാനേജ്‌മെന്റിന്റെ തീരുമാനത്തെയും ഹെൻറി അഭിനന്ദിച്ചു. “ബേൺലി തരംതാഴ്ത്തപ്പെട്ടതിന് ശേഷവും കമ്പനിയെ നിയമിച്ച ബയേൺ ബോർഡ് വലിയ അഭിനന്ദനം അർഹിക്കുന്നു. ക്ലബ്ബിന്റെ രീതികളുമായി ഒത്തുപോകുന്ന എന്തോ ഒന്ന് അദ്ദേഹത്തിൽ അവർ കണ്ടുപിടിച്ചു. അതൊരു മികച്ച തീരുമാനമായിരുന്നു,” അദ്ദേഹം കൂട്ടിച്ചേർത്തു.