ലയണൽ മെസ്സിക്ക് ശേഷം ലാമിൻ യമാലിനെ ലഭിച്ചത് ബാഴ്‌സലോണയുടെ വലിയ ഭാഗ്യമാണെന്ന് അർജന്റീനൻ ഫുട്ബോൾ ഇതിഹാസം ജോർജ് വാൽഡാനോ പറഞ്ഞു. ലോക ഫുട്ബോളിൽ മെസ്സി ചെലുത്തുന്ന സ്വാധീനത്തെക്കുറിച്ചും അദ്ദേഹം പ്രശംസിച്ചു.

പുതിയ താരങ്ങൾ ഉയർന്നു വരുന്നുണ്ടെങ്കിലും മെസ്സിയുടെ സ്ഥാനം ഇപ്പോഴും അദ്വിതീയമാണെന്ന് വാൽഡാനോ വിശ്വസിക്കുന്നു.

“ബാഴ്‌സലോണ വളരെ ഭാഗ്യവാന്മാരാണ്. മെസ്സിക്ക് ശേഷം യമാൽ വരുന്നത് ഒരേ ജീവിതത്തിൽ രണ്ട് തവണ ലോട്ടറി അടിച്ചതുപോലെയാണ്,” വാൽഡാനോ പറഞ്ഞു.

ഫുട്ബോൾ ലോകത്ത് മെസ്സിയുടെ സ്വാധീനത്തെക്കുറിച്ച് അദ്ദേഹം കൂടുതൽ വിശദീകരിച്ചു.

“അദ്ദേഹത്തെ തടയാൻ ശാസ്ത്രീയമായ വഴികൾ എല്ലാവരും തേടുന്നുണ്ട്, എന്നാൽ ആർക്കും അത് സാധിക്കുന്നില്ല. വളരെ പതുക്കെയാണ് മെസ്സി കളിക്കുന്നത്, എന്നിട്ടും അദ്ദേഹത്തെ തടയാൻ ആർക്കും കഴിയുന്നില്ല. വേഗത കുറഞ്ഞുവരുമ്പോഴും അദ്ദേഹത്തിന്റെ തന്ത്രങ്ങൾ ആർക്കും മനസ്സിലാകുന്നില്ല; അദ്ദേഹം ഒരു അത്ഭുതം തന്നെയാണ്.

കഴിഞ്ഞ 20 വർഷത്തെ ഫുട്ബോൾ ചരിത്രത്തിൽ മായാത്ത അടയാളം പതിപ്പിച്ച ഒരു പ്രതിഭയാണദ്ദേഹം. ഇതുപോലൊന്ന് ഇനി സംഭവിക്കുമോ എന്ന് എനിക്കറിയില്ല.

മെസ്സിയുടെ സാന്നിധ്യം തന്നെ വലിയൊരു കാര്യമാണ്; സഹതാരങ്ങൾക്ക് അദ്ദേഹത്തോട് ആരാധനയല്ല, അതിലുപരിയായ സ്നേഹമാണുള്ളത്. ഖത്തറിൽ അത് വലിയ ഫലം നൽകി: ഒരു സഹതാരത്തിന് വേണ്ടി കളത്തിലിറങ്ങുന്നതല്ല, ഒരു സുഹൃത്തിന് വേണ്ടി കളത്തിലിറങ്ങുന്നത്. ആ സുഹൃത്തിനെ ലോകചാമ്പ്യനാക്കുക എന്നത് എല്ലാവരുടെയും കൂട്ടുത്തരവാദിത്തമായി മാറി.

ലോകചാമ്പ്യന്മാരായതിലും മെസ്സിയെ ചാമ്പ്യനാക്കാൻ കഴിഞ്ഞതിലുമാണ് അവരുടെ സന്തോഷം. ആ മനോഭാവം ഇപ്പോഴും നിലനിൽക്കുന്നു, അത് അവർക്ക് വീണ്ടും മത്സരങ്ങളിൽ മുൻതൂക്കം നൽകും.”